SIK-p siulittaasuata portørip ilorrisimaarutiginngikkai: Suliartoqquakka

Nuummi portørit sulinerminni atukkaminnik naammaginninnatik suliumajunnaarsimanersut ullaaq manna nalornissutigineqarpoq.

KNR-ip paasissutissarsiai naapertorlugit Dronning Ingriudip Napparsimmavissuanut portørit pingasuinnaat ullumi suliartorput.

Sinneri napparsimallutik nalunaarsimapput.

Sulinermik inuussutissarsiuteqartut peqatigiiffiata SIK-p siulittaasuata, Jess G. Berthelsenip tamanna suliumajunnaarnerunngitsoq oqaatigaa, portørilli SIK-p Namminersorlutik Oqartussallu akornanni isumaqatigiinniarnerata unittoorsimanera naammagisimaanngilaat.

- Suliumajunnaarnermik taaneqarsinnaanersoq naluara, kisianni isumaqatigiinniarnerit sivitsornerat qatsukkaat tusarpara, Jess G. Berthelsen oqarpoq, nangillunilu:

- Portørit ullumi attaveqarfigaakka suliartoqqinnissaanillu oqarfigalugit.

AAMMA ATUARUK Jess G. Berthelsen SIK-mi siulittaasutut qinigassanngorteqqittoq

SIK-p siulittaasuata sulinermik inuussutissarsiuteqartut peqatigiiffiata Namminersorlutik Oqartussallu akornanni isumaqatigiinniarnerit marsip ulluisa 31-aatinnagu naammassisussaagaluarput, tamannali iluatsinngilaq.

- Naalakkersuisut ukua nutaat iluamik inissilluariarpata naatsorsuutigivarput ulluni tulliuttuni isumaqatigiinniarnerit aallarteqqissinnaassasut pisortanut, Jess G. Berthelsen oqarpoq.

Akissarsiaqarnerulersitsiniartoq 

SIK-p ilaasortaminut akissarsiaqarnerulersitsinissamik kissaateqarnera pissutigalugu illuatungeriit suli isumaqatigiissuteqannginneranut pissutaasup aapparaa:

- Tassa maannakkut atsiorsinnaannginnitsinnut peqqutit ilagaat: neqeroorutaat naammaginnginnatsigu. Maannakkut sorsunnerup tassa, Ukrainep Ruslandillu sorsunnerisa kingunerisaanik ilaatigut naatsorsuutigineqarpoq nioqqutissat piffissami qanittumi annertulaartumik qaffassasut. Taamaattumillu pisortat isumaqatigiinniartitaat qinnuiginikuuagut aningaasanik amerlanerusunik aallertariaqartut isumaqatigiissuteqassagutta.

- Ulluni qaninnerusuni isumaqatigiinniarnerit aallarteqqissinnaanissaat naatsorsuutigaara.

AAMMA ATUARUK Suliumajunnaartoqassanngilaq: Air Greenland flymekanikerillu isumaqatigiipput

KNR-ip portørit namminneq peqatigiiffiannit oqaaseqartitsiniarsarigaluarpoq, oqaaseqartartorli ataasinngorpaatinngu oqaaseqarumanngilaq.

Nuummi portørit sulinermi atukkatik pitsanngortinneqanngippata suliumajunnaarnissamut piareersimallutik peqatigiiffiup marsimi tusagassiuutinut nalunaarutiginikuuaa.

Portørit tassani marlukkaarlutik sulinissamik kissaateqarnertik atortorissaarutinillu nutaanik nutaaliaanerusunillu pisariaqartitsillutik ilaatigut assersuutigaat.

Peqqinnissamut aqutsisoqarfiup portørit suliumajunnaarnerat ilisimasaqarfiginagu KNR-imut oqaatigaa.