SIK-p GE-llu aningaasanut inatsisissaq pakatsissutigigaat

- Isaatitassanut tunngasut taakkua amigaatigaakka. Tamattalu atugarissaarnerulissagutta nunarput aallariaqqittariaqarpoq. Maannakkut annertusigaluttuinnartumik Danmarki isumalluutigileraluttuinnarparput aaligooq namminiilivinniartugut. Killormorluinnaq maannakkut ingerlavugut, Jess G. Berthelsen KNR-mut oqarpoq.

AAMMA ATUARUK Aningaasanut inatsisissaq sukannerfiusorujussuussaaq – meeqqalli inuusuttullu qitiutinneqassapput

Naalakkersuisut aningaasanut aappaagumut inatsisissatut siunnersuutaanni nunap karsiata isertitassai 7.5 milliardit koruuniupput. Taakkua 58 procentii naalagaaffimmit tapiissutineerlunilu EU-mi isumaqatigiissutineersuupput.

GE: Qulakkeerinninnermik takunngilagut

Sulisartut siulittaasuat kisimi pakatsinngilaq. Sulisitsisut pisortaat nunarsuarmi aningaasarliornermi nunatta aningaasarsiorluarnerunissaata qulakkeerneqarniarneranik takusaqanngilaq.

- Nunarsuarmi aningaasarsiorneq unammillernartoqarpat inuussutissarsiornitta qaffakkaluttuinnarlunilu ingerlaannarnissaa aningaasanut inatsisikkut qulakkeertariaqarpoq. Taannalu qanoq eqqarsaatigineqarsimanersoq maannakkut takusinnaanngilara, Christian Kjeldsen oqarpoq.

SIK: Qaleralinniat akileeqataallik

SIK-p siulittaasuata siunnersuut taama isikkoqartillugu ilaasortami aningaasarsiaqarnerulersinnaanerat takujuminaatsippaa. Taamaattumik umiatsiaaqqanik qaleralinniat sulisartunut pilliuteqarnerusariaqartut kissaatigaa.

- Sinerissap qanittuani qaleralinnut akitsuutit peerpaat. Ilaasortatsinnut ima iluaqutigineqarsinnaasimagaluartut: Uagut ilaasortagut maannakkut qaffaatip qaavatigut 1 koruunit 39 øremik akunnermut ukiuni sisamani tulliuttuni ukiut tamaasa qaffassimasinnaagaluarpagut, Jess G. Berthelsen oqarpoq.

AAMMA ATUARUK Illuatungiliuttut: Aningaasanut inatsissatut siunnersuummi nutaaliortoqanngilaq

Naalakkersuisulli oqarasuaatip siunnersuisarfiup Tusaanngap, meeqqat, inuusuttut inersimasullu - ajornartorsiuteqartillutik sianerfigisinnaasaata ammasarfiisa sivitsorneqarnissaat pingaarnerutippaat. Oqarasuaat ullumikkut sapaammit sisamanngornermut nalunaaqutaq qulingiluanit unnuap qeqqanut kiisalu tallimanngornermi arfininngornermilu qulingiluanit ullaassakkut sisamat tungaanut ammasarpoq. Taanna maanna ulloq unnuarlu ammasalissaaq.

Nuna tamakkerlugu meeqqanut immikkoortoqarnerup tarnikkut ikiorneqarnissamut utaqqinerup sivisussusaanut annikillisaataassaaq. Naalakkersuisut taassuma ingerlannissaanut ukiumut 8,7 millionit koruunit immikkoortippaat.

Naalakkersuisuttaaq Tasiilami ilinniarfimmik nutaamik,Tasiilami inuusuttut ingerlariaqqinnissaannut periarfissiisussamik pilersaarusiornissamut 1 millionit koruuninik immikkoortitsiniarput.

Naalakkersuisut aningaasanut aappaagumut inatsisissaq millioninik 71-nik amigartoortussatut missingersorpaat.

- Politikkikkut nutaartaqannginnera isigigaanni amigartooruteqarneq ajorluinnarpoq, Demokraatit siulittaasuat, Jens-Frederik Nielsen oqarpoq.