SIK: Karl-Kristian Kruse putsup ataaniippaluppoq
Aalisakkanik suliffissuarni sulisunik amigaateqarneq ajornartorsiutitut annertuutut AalisarnermutnNaalakkersuisup isigaa, taamaalineranilu suliffisaaleqisut amerlallutik.
- Inuit peqqissut sulisinnaasariaqarput, ullumikkut ajornanngippallaamik naaggaarsinnaallutalu piumanngissinnaanerput atuuppallaaqaaq, Karl-Kristian Kruse aviisimi Sermitsiami apersorneqarluni taama oqarpoq.
Karl-Kristian Kruse isumaqarpoq inuk peqqissoq sulisinnaasutut nalunaarsorneqartarmat sulisinnaanissaanik innersuunneqartariaqaraluartoq.
Sulinissamut innersuussutigineqartoq tigujumanngippassuk pisortanit ikiorsiissutinik tunineqartarnerat unitsinneqartariaqarpoq.
Karl-Kristian Krusep oqaaseqaatai SIK-ip siulittaasuata Jess G. Berthelsenip sakkortuumik qisuariarfigai.
AAMMA ATUARUK Qasigiannguit: Sulisussaaleqiffiusumi suliffissaaleqisorpassuit
AAMMA ATUARUK Maniitsumi aalisakkerivik aamma sulisussaaleqiffiusoq
- Naalakkersuisunut ilaasortaq, aalisarnermut naalakkersuisoq Karl-Kristian Kruse, putsup ataaniippaluppoq aammalu sulisartunik suliffissaaleqisunik mitaalliineruvoq suliffissanillu neqeroorfigineqaraluarlutik narrutunerarlugit taagamigit, SIK-ip siulittaasua tusagassiuutinut nalunaaruteqarluni taama allappoq.
SIK-mit neriuutigineqarpoq Karl-Kristian Krusemit oqariartuutigineqartut Naalakkersuisut sinnerlugit oqariartuutaanngitsut kisiannili Aalisarnermut Naalakkersuisutut oqariartuutigigai.
Jess. G. Berthelsenip Karl-Kristian Kruse uparuarpaa, Naalakkersuisoqarfimminut attumaassuteqanngitsumik oqaaseqarmat.
Sulisartut kattuffianni sulittaasup nassuerutigalugu oqaatigaa suliffissaaleqisut sulisitsisullu unammilligassaqarmata, ajornartorsiutillu aaqqinneqarnissaannut suleqatigiinnissamik kaammattuuteqarluni.