Qasigiannguit: Sulisussaaleqiffiusumi suliffissaaleqisorpassuit

Sulisut 60-it massakkorpiaq pisariaqartinneqartut nalunaarutigineqarpoq, Qasigiannguanilu tunisassiorfiup ingerlatsisuata pissutsit ajorluinnarnerarpai:

- Naak tunisassiorfik suleqatigiiaanut marlunnut avitanik 120-nik sulisoqaraluartoq sulisut 60-it amigaatigineqarput. Tamatuma saniatigut sulisut 30 procentii ullut ilaanni sulinngitsoortarput, Royal Greenlandip Qasigiannguani tunisassiorfiata ingerlatsisua Frank Hagen oqarpoq, nangillunilu:

- Taamaattumik tunisassiarisartakkatta annertussusaat masssakkut 60-65 procentiupput. Pissutsit eqqaaneqartut atuutsillugit tunisassiornissamut pilersaarutit malinneqarsinnaaneq ajorput, tamannalu tunisassiakippallaarnermik tamatumanilu isertitakippallaarnermik kinguneqartarpoq, Frank Hagen oqarpoq.

Taassuma aamma oqaatigaa tunisassiorfik qalerallit nerpiinik tunisassianillu immikkut ittunik massakkut tunisassiorsinnaanngitsoq, taamaattumillu qaleralinnik ilivitsunik kisiat qerititsisinnaasoq:

- Sulisussaaleqinerput pissutigalugu qalerallit nerpiinik tunisassianillu immikkullu tunisassianik tunisassiorsinnaannginnatta qalerallit tunisassiassat affaat ilivitsuutillugit qerisiinnartariaqartarpavut. Qaleralinnik ilivitsunik taama annertutigisumik qerititsigaangatta aningaasarpassuit annaasarpavut, Frank Hagen oqarpoq.

Qalerallit 2,5 tonsit igiinnarneqartariaqarsimapput

Qalerallit 1800 kiilut ajortunngorsimasut ullut 14-it matuma siornatigut igiinnarneqartariaqarsimasut Royal Greenland Qasigiannguani tunisassiorfiata ingerlatsisua oqarpoq, qaammatillu kingulliit marluk ingerlaneranni qalerallit katillugit 2,5 tonsit tassa igiinnarneqartariaqarsimallutik.

Qasigiannguani tunsiassiorfimmi pissutsinik aaqqiisoqarnissaa pillugu, tunisassiorfimmilu sulisussanik sulisussarsiornissaq pillugu, SIP Qasigiannguit Qaasuitsullu Kommuniani sulisussarsiuussisarfik suleqatiserisimallugit, Frank Hagenip oqaatigaa.

- SIP Qasigiannguit sianerfigalugu allaffigalugulu suleqatiseraara. Tunisassiorfimmut suliartortitsinissani neriosuutigaa, suliartortoqaranili. Suliffissarsiuussisarfik tunisassiorfimmut suliartortitsiniarsimavoq. Suliartortoqartarpoq, suliartortut ilaat suliartoqqinneq ajorput suliartortitaagaluillu ilaat suliartunngiivinneq ajorlutik, Frank Hagen oqarpoq.