Maniitsumi aalisakkerivik aamma sulisussaaleqiffiusoq
Aalisakkerivik sulisunik 30-t 40-llu akornanni amigaateqarpoq, naak sulisussarsiorneq immikkut suliniuteqarfigineqaraluartoq.
- Sulisussaaleqineq pissutigalugu maannakorpiaq tunisasiarisinnaasatta affaannai tunisassiaraavut. Taamaattumik saarulliit nerpii tamakkiisumik tunisassiarisinnaannginnatsigit tunisassiassaagaluit annertuut blokkinut poortorlugit qerititerneqarput. Tamannalu annikinnerujussuarmik isertitsissutaavoq, taama oqarpoq Maniitsumi Royal Greenlandip tunisassiorfiata ingerlatsisua Lisbeth Østergaard.
Aalisakkerivimmi sulisut maannakkorpiaq 85-it missaanniipput, ulluunerinnaanilu tunisassiortoqarpoq. Aalisakkeriviup ingerlatsisuata oqaatigaa sulisut amerlanerusut pissarsiarineqarsinnaasuuppata ullukkut unnukkullu sulineq ingerlanneqarsinnaagaluartoq, aalisakkerivimmilu tamakkiisumik tunisassiorneq taamaaliornikkut ingerlanneqarsinnaagaluartoq.
- Inuit 30-t 40-t sulilertissinnaasuugutsigit, taava sulineq ullukkut unnukkullu ingerlanneqarsinnaassagaluarpoq taamaasillutalu ullormut 50 tonsit angullugit tunisassiarisinnaassagaluarpavut. Kisiannili sulisut sulinngitsoortarnerat pissutigalugu ullut tamaasa sulisut 10 procentii amigaatigisaratsigit ullukkut unnukkullu tunisassiorsinnaaneq ajornakusoorpoq, Lisbeth Østergaard oqarpoq.
AAMMA ATUARUK Ikioqatigiilluta aaqqiissutissamik ujartuisariaqarpugut
AAMMA ATUARUK Qasigiannguit: Sulisussaaleqiffiusumi suliffissaaleqisorpassuit
Aningaasarsiffimmi suliartunngitsoortartut
Sulisut sulinngitsoortut taartissaannik sulisunik pissarsiornissaq anguniarlugu immikkut suliaqartussamik sulisumik Royal Greenland atorfinititsisimavoq. Taanna sulisussarsiornerinnarmik suliaqartuuvoq, taamaakkaluartorli ajornartorsiut qaangerneqanngilaq.
-Sulisut suliartunngitsoortarnerat ataatsimut isigalugu ajornartorsiut annertuvoq, ingammik aningaasarsiffiup nalaani taassumalu kingorna ataasinngornikkut. Taamaattoqartillugu sulisut sisamararterutaat amigaatigisarpavut, aalisakkeriviup ingerlatsisua oqarpoq.
- Taamaattumik sulisussarsiortartussamik atorfinitsitisivugut. Taassuma sulisut suliartunngitsoortillugit sianeqattaarluni sulisussarsiornerinnavik suliaraa. Tassa ajornartorsiut iliuuseqarfigigaluarparput aamma suliffisarsiuussisarfik suleqatigilluagarput suleqatigalugu. Kisiannili sulisunut takkutinngitsoortunut nukiit sulisussarsiornermut atorneqartut atulussinnarneqartarput, Lisbeth Østergaard oqarpoq.
Qeqqata Kommuniata suliffissarsiuussisarfiata nalunaarutigaa Maniitsumi juulip naanerani inuit 167-it sulisussarsiortutut nalunaarsoqqasut. Qeqqata Kommuniani illoqarfinni nunaqarfinnilu tamani juulip naanerani inuit 599-it suliffissarsiortut nalunaarsoqqapput.