Ikioqatigiilluta aaqqiissutissamik ujartuisariaqarpugut
Qasigiannguani aalisakkanik tusitsiviup sulisussaaleqinera KNR-ip oqaluttuarereeraalu oqallittoqangaatsiarpoq.
Tamatumunngalu sulisut ukiuunerani angerlartiinnarneqartarnerat aammalu suliffissarsiortaraluartut itigartinneqartarnerat peqqutaasoq, Qaasuitsup Kommuniani Ilaqutareeqarnermi ataatsimiititaliami siulittaasoq Kristian Jeremiassen isumaqarpoq.
- Ukiut kingulliit fabrikkimi aasakkuinnaq aalisangaqarluarneranilu sulisut holdit marluk sulisinneqartarput. Aalisagaarunneranilu sulisut ikilisarneqartarlutik, Kristian Jeremiassen oqarpoq.
Ingerlariaaseq allanngortoq
- Nuannaarutigalugu oqaatigisinnaavara ukioq kingullermiilli aalisakkat amigaataanerat peqqutaalluni angerlaannartitsinikuunngilangut sulisunik. Suliassat naammaannavipput. Kisiannili oqaatigerusuppara aasakkut suliartortartunut tunngatillugu, illoqarfinnit imaluunniit nunaqarfinnit atorluaanissaq periarfissaasarmat, aamma iluaqutigilluartarpavut, Royal Greenlandimi sulisoqarnermut pisortaq Søren Olsen Damgaard oqarpoq.
Qaasuitsup kommuniani ataatsimiititaliaq Qasigiannguani suliffissaaleqineq pillugu paasissutissinneqartarpoq. Illoqarfimmi inuit 35-it suliffissaaleqisutut nalunaarsorneqarsimapput, suliffissaaleqisullu ilaat fabrikkimi suliffissarsiortaraluarsimapput, atatsimiititaliamili siulittaasoq naapertorlugu iluatsitsineq ajorlutik.
Aamma atuaruk Qasigiannguit: Sulisussaaleqiffiusumi suliffissaaleqisorpassuit
- Ataatsimiititaliamik siulittaasutut ilisimasakka malillugit sapaatip akunnera kingulleq suliffissarsiortoq oqarfigineqarsimavoq amigaateqaratik. Paasissutissaq aamma taamattoq ippassaq uannut tikiunneqarpoq, Kristian Jeremiassen oqarpoq.
Taamaattoqarsimasinnaanerali Royal Greenlandip sulisoqarnermi pisortap ilisarisinnaanngilaa.
- Soorunami innuttaasut kommunilu minnerunngitsumik suliffissarsiussisarfiat suli annertunerusumik suleqatiginiarsarissavagut. Kisianni nalunaarutigissavarput qanoq ilungersunartigisoq suliffeqarfimmut taamatut sulisunik amigaateqartuarneq, Søren Olsen Damgaard taama oqarpoq.
Ikioqatiserinnipput
Ataatsimiisitaliamili siulittaasup isornartorsiuinini sakkortugaluartoq suleqatigiinnissamut ilaserinnippoq:
- Taanna ajornartorsiut aaqqissagutsigu aaqqissuuteqartariaqarpugut suleqatigiilluta immitsinnut pisuuteqattaannata, Qasigiannguarmiut suliumanngillat imaluunniit Royal Greenland ukioq naallugu sulisitsiumanngilaq, Kristian Jeremiassen oqarpoq.
- Siullermik oqaatigissavara isumaqataavunga inuiaqatigiinni tamani ajornartorsiutaasoq. Royal Greenlandimiinnanngitsoq suliffeqarfiit allat ajornartorsiutigigaat ajoraluartumik. Suliffimmi atugassarititaasut akulikitsumik isiginiarneqartarput uagut tungitsinniik, Søren Olsen Damgaard naggasiivoq.
