Seruminstituttip coronamik tunillatsissimasut sapaatit akunnerini tulliuttuni marlunni amerlissangatikkai

Statens Serum Institutimit (SSI) sapaatip-akunnerata siuliani missiliuinerit naapertorlugit Danmarkip ilarujussuani coronamik tunillatsissimasut sapaatit akunnerini aggersuni ikiartortussatut missiliutigineqaraluarput.

SIunissamulli naatsorsuutit sapaatip akunnerani matumani allaanerujussuupput.

Dnmarkimi nunap immikkoortuini tamani coronavirusimik tunillatsissimasutut ullormut uppernarsarneqartut sapaatit akunnerini tulliuttuni marlunni amerliartornissaat SSI-mit naatsorsuutigineqarpoq.

Tamanna SSI-mit nalunaarusiami kisitsinerit atorlugit naatsorsuinerit takutippaat, kisitsinikkut ulluni tulliuttuni 14-ini ineriartortoqarnera naatsorsorniarneqarpoq.

Missiliuinerit qularnartumik missiliorneqartut SSI-mit erseqqissaatigineqarpoq.

AAMMA ATUARUK Danmarkimi februaarimiit maannamut 60.000-t tunillatsissimasutut uppernarsarneqartut

Missiliuineq naapertorlugu nuna tamakkerlugu decembarip aallartinnerani ullormut tunillatsittutut uppernarsarneqartut 1350-it missaaniittarnissaat naatsorsuutigineqarpoq. Taakku ullormut 51.000-inik misissuinissaq tunngavigalugu naatsorsorneqarput.

Danmarkimi illoqarfiit pingaarnersaanni sapaatit akunnerini marlunni tulliuttuni tunillatsissimasutut ullormut uppernarsarneqartut 500-t missaanniittanngatinneqarput.

Midtjyllandimi Syddanmarkimilu tamanna 350-it missaanniittassangatinneqarpoq, nunallu immikkoortuani Sjællandimi ullormut tunillatsittutut uppernarsarneqartut ullormut 125-t missaanniissangatinneqarput.

Nunap immikkoortuani Nordjyllandimi coronamik sapaatit akunnerini tulliuttuni marlunni tunillatsittukinnerpaassangatippaa. Taamaakkaluartorli ullormut tunillatsissimasutut uppernarsarneqartut 50-inik amerlissangatillugit.

Nordjyllandimi kommunini arfineq-marlunni minkinit coronavirusip allanngorarnera pissutigalugu immikkut ittunik killilersuisoqarpoq. Killilersuinerilli sapaatip akunnerani matumani qasukkaamiarneqalaarput.

AAMMA ATUARUK Corona: Jyllandip avannaaneersut kommunit killeqarfii qaangeqqusaanngikkaat

Statens Serum Institut naapertorlugu pissutsit allanngorarneri sapaatit akunnerit marluk missaat qaangiunnerani takuneqarsinnaalertarput.

Tamanna coronavirusimik tunillatsissimasut tunillatsissimasutut uppernarsarneqarsinnaalernissaannut kinguaattoortoqartarneranit pissuteqarpoq.

Marlunngornermi naatsorsueqqissaarnermi tunillatsissimasutut uppernarsarneqartut katillugit 1220-upput. Taakkulu misissorneqartunit 68.750-init tunillatsissimasuullutik.

/ritzau/