Danmarkimi februaarimiit maannamut 60.000-t tunillatsissimasutut uppernarsarneqartut
Coronamik tunillatsissimasut nutaat 1037-t ullormi kingullermi uppernarsarneqarput.
Statens Serum Institut taama paasissutissiivoq.
Napparsimmavimmut uninngatinneqartut pingasunik ikilipput. Coronamik tunillatsissimasut danskit napparsimmaviini uninngasut katillugit 236-upput.
Coronamut attuumassuteqartumik toqquteqartut ataatsimik ilapput, taamaalilluni covid-19-eqarlutik toqusut 756-inngorput.
Ullormi ataatsimi kingullermi misissorneqarsimasut 71.073-it akissutersipput, taakkunannga 1037-t tunillatsissimasutut uppernarsarneqarput.
Tamanna misissortittut 1,4 procentiisa covid-19-imik tunillatsissimanerannik isumaqarpoq.
AAMMA ATUARUK Corona: Jyllandip avannaaneersut kommunit killeqarfii qaangeqqusaanngikkaat
Tunillatsissittut procentinngorlugu amerlassuserisartagaat ulluni kingullerni taamaaginnakanneriartorpoq.
Immikkut ilisimasallit naapertorlugit tamanna tunillaassuunnerup annikilliartorneranut takussutissaavoq.
Tunillatsissimasut tunillassinnaannut kisitsit 0,9-mut appartoq marlunngornermi saqqummiunneqarpoq.
Tassa imaappoq coronamik tunillatsissimasut qulit qulingiluat allat tunillassinnaasarpai.
Tamannalu tunillaassuunnerup uteriartoqqinneranut takussutissap aapparaa.
Danmarkimi coronamik tunillatsissimasut 60.000-t uppernarsarneqarsimasut tallimanngornermi naatsorsuinermi takuneqarsinnaavoq.
Taakku Danmarkimi tunillatsissimasoq siulleq februaarip ulluisa 27-anni uppernarsarneqarnerata kingornatigut tunillatsissimapput.
Tunillatsissimasunit 60.000-init 45.705-it tunillatsissimanertik qaangersimavaat. Kisitsilli naatsorsuinernit tunngaveqarpoq. Taamaalilluni uppernarsarnissaa qularnartoqarluni.
/ritzau/