Corona: Jyllandip avannaaneersut kommunit killeqarfii qaangeqqusaanngikkaat
Jyllandip avannaani kommunini arfineq-marlunni innuttaasut tamarmik namminneq kommunerisaminniiginnassapput.
Tamanna Vesthimmerlands Kommunip borgmesteriata, Venstremeersup, Per Bach Laursenip DR Nyhederimut uppernarsarpaa.
Killilersuinerit aqagu tallimanngornermit sapaatini-akunnerni sisamani atuutissapput.
Kommunini arfineq-marlunni neriniartarfiit, sutorniartarfiit imerniartarfiit aamma kulturikkut sunngiffimmilu susassat tamarmik matoqqassapput.
Kommunini taakkunani arfineq-marlunni atuarfiit ulluuneranilu paaqqinniffiit suli ammatinneqassapput, inersimasunulli atuartitsinerit pinasuartumik atuartitsinermut killilerneqassapput.
Killilersuinerit kommunini ukunani atuutissapput, Hjørring, Frederikshavn, Brønderslev, Jammerbugt, Thisted, Vesthimmerland aamma Læsø.
AAMMA ATUARUK Mette Frederiksen tusagassiortunik katersortitsinermi: Minkit tamarmik toqunneqassapput
Jyllandip avannaani kommunini taakkunani arfineq-marlunni minkiuteqarfippassuaqarnera pissutaavoq. Danskit minkiutaat tamarmik toqorarneqassasut danskit mininsteriunerata, Mette Frederiksenip (S) ippassaq nalunaarutigaa, matumanilu minkit coronavirusimik tunillatsissimasut akornanni virusip naajartornerlunneranik inunnut tunillaassuuttoqalernera pissutaavoq.
Virusimik naajartornerluttumik inunnut aqqaneq-marlunnut tuniluussimasumik maannakkut nalunaarsuisoqarpoq. Virusi naajartornerluttoq akiuussutissanut annikinnerusumik qisuaateqartarpoq, taamaalillunilu akiuussutissaalersussaq iluaqutaasussaajunnaaratarsinnaalluni.
Coronavirusip naajartornerlunnera minkeqarfinni assigiinngitsuni tallimani nassaarineqarpoq.
Danmark nunarsuaq tamakkerlugu minkit amiinik tunisassiornerpaavoq. Danmarkimi minkit 15 aamma 17 millionit akornanniipput.
Nunatsinni kommunimit kommunimut allamut angalalluni aaqqissuussinernut nalunaaruteqaqqaarluni peqataaffigineqartussanut peqataanissaq aamma inerteqqutaavoq.