Ilisimatusartoq: Sermersuup aakkiartornera unitsitassaajunnaareerpoq
Silap allanngoriartornerata kingunerisaanik sermersuaq aakkiartorpoq, iliuuseqarnissamullu kingusinaartoqalereerpoq, sermersiooq Jason Box oqarpoq.
Jason Box sermersuarmi 1990-imiilli 20-riarluni ilisimasassarsioqataasarsimavoq, nunatsinnilu sermersuup siunissaa qaamavallaanngitsoq pillugu atuagassiami Science Directimi allaaserinneqataasimavoq.
AAMMA ATUARUK Londonimi sermit saqqummersinneqartut aakkiartortut
Sermersiooq sermersuup aakkiartornera pillugu misissuisoq kujataaneeqqammerpoq, takusanilu tupigusuutigai.
- Silap allanngoriartornera aallaavigalugu aputip Sermillu aakkiartornerannut attuumassutaat ilisimatusaatigaara,
sermersuullu aakkiartornerani sermeq iminnguussimasoq aakkiartorpoq sermersuarlu paatut isikkulimmik tarrajuttuinnaavoq, Jason Box oqarpoq nangillunilu:
AAMMA ATUARUK Sermersuaq aatsaat taamak aakkiartortigaaq
- Naak CO2-mik mingutsitsineq massakkut killilersorneqaleraluarpalluunniit aamma Pariisimi isumaqatigiissut malinneqaraluarpalluunniit, Kalaallit Nunaanni sermersuaq aakkiartortuassaaq, apeqqutaaginnarporlu qanoq sukkatigusumik aakkiartussanersoq, Jason Box DR-mut oqarpoq.
Naatsorsuinerillu kingulliit naapertorlugit 0,8 aamma 3,2 gradenit tikillugit kiannerulissappat tamanna sermersuup aakkiartorneranut sunniuteqarnerluleriissaaq. Maannamut nunarsuaq agguaqatigiisillugu 1,1 grademik kiannerulereerpoq.
