ASSIT Sermersuumi meeqqat isummersorfiini pilersitsinissaq atsioqatigiissutigineqartoq
Borgmesteri Asii Chemnitz Narupip, Ilaqutariinnermullu, Naligiissitaanermut Isumaginninnermullu Naalakkersuisup Martha Lund Olsenip, suliniaqatigiffillu NAKUUSA-p ippassaq ataasinngornermi atsioqatigiinnerisigut tamanna pivoq, tassa NAKUUSA, Namminersorlutik Oqartussat aamma Naalagaaffiit Peqatigiit meeqqat pillugit suliniaqatigiiffiata UNICEF-ip suleqatigiissutigalugu suliniutigisaata piviusunngornera atsioqatigiissutigineqarpoq.
Borgmesterilu atsioqatigeereernerup kingorna nuannaarpoq:
- 0-iminngaanniit 10-p tungaanut uuttuissagutta nuannaarnera 10-mik uanga nalilerusuppara. Ullumikkut alloriarneq pingaaruteqartorujussuuvoq meeqqanut ataasiakkaanut atuartunut Kommuneqarfik Sermersuumi aamma uagutsinnut qinikkanut. Tamat oqartussaaqataanerannik siuarsaaniarnerput, nukittorsaaniarnerput eqqarsaatigalugu ullumikkut alloriarpugut pingaarutilimmik meeqqat qaaqqullugit oqarfigalugit ilissi aamma isummasi meeqqat nipaasa pingaaruteqarnerat matumani naqissuserneqarpoq, Kommuneqarfik Sermersuumi borgmesteri Asii Chemnitz Narup taama oqarpoq.
Aamma atuaruk Kommuneqarfik Sermersooq meeqqat isummersorfiinik pilersitsilersoq
Kommuneqarfik Sermersuumi meeqqat inuusuttullu Meeqqat Isummersorfiinik pilersitsisoqarneratigut ulluinnarni sunniuteqaqataanerulernisssaat qulakkeerneqarsinnaasoq Asii Chemnitz Narup isumaqarpoq:
- Atuarfinni ataasiakkaani, taavalu aamma Meeqqat Isummersorfiini meeqqat oqalliseriarlutik isummersuutitik qinikkanut apuuttalissavaat, taamaalilluni aaqqissuussamik massakkut ilusiliivigut meeqqat nipaasa qinikkanut qanoq apuunneqarsinnaanerat, taamaalillunilu meeqqat aamma sunniuteqarsinnaanerat qulakkeerneqarnerusutut uanga isumaqarfigivara, Asii Chemnitz Narup taama oqarpoq.
Aamma atuaruk Qeqqata Kommunia meeqqat isummersorfiannik pilersitsisoq
Meeqqat Isummersorfiinik Kommuneqarfik Sermersuumi pilersitsisoqarnerata saniatigut Qeqqata Kommuniani Meeqqat Isummersorfiinik pilersitsisoqareerpoq. Meeqqallu Isummersorfiinik kommunit sinnerini aamma pilersitsisoqarumaartoq, Ilaqutariinnermut naalakkersuisoq Martha Lund Olsen oqarpoq:
- Neriuppugut ukioq manna tamanna aamma qaammatini aggersuni angussallutigu. NAKUUSA aamma suliaqarpoq, kommunit sinneri, Kommune Kujalleq taavalu Qaasuitsup Kommunia taamatut atsioqatigiinnissamik siunertaqarlutik taamatut aamma sulipput, Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq.
