Qeqqata Kommunia meeqqat isummersorfiannik pilersitsisoq
Qeqqata Kommuniata borgmesteria Hermann Berthelsen, suleqatigiinnissamut isumaqatigiissut borgmesterit akornanni siulliulluni atsiorpaa. Nakuusap suliniut Qeqqata Kommunianut ukioq kingullerli saqqummiutereerpaa, isumaqatigiissutillu atsiorneqarnissaanut maanna piffissanngorluni.
Meeqqat Isummersorfii kommunini sisamani Nakuusap suliniutaa aallaavigalugu pilersinneqassapput, soorlu aamma Nakuusaaqqat, atuarfinni tamani pilersinneqassallutik. Nakuusaaqqat atuartut annerniit inuttaqartussaapput, nunatsinnilu meeqqat sinnerlugit oqaaseqartartussaallutik.
- Naalakkersuisuniit meeqqat inuusuttuaqqallu isumaat tusassallugit pingaartipparput. Siunissarivagut, siunissavullu patajaassuseqarlutillu sapiissuseqassapput, taamaattumik Nakuusap suliniutaa "Uagut ulluinnarput uagut niperput" Naalakkersuisuniit tapersersorparput, Ilaqutariinnermut, Naligiissitaanermut Isumaginninnermullu naalakkersuisoq Martha Lund Olsen oqarpoq, meeqqallu pisinnaatitaaffitik ilisimassagaat pingaaruteqartoq oqaatigalugu, tamannalu Nakuusap suliniutaatigut piviusunngortinneqarsinnaanera erseqqissaatigalugu.
Nakuusa tassaavoq Naalakkersuisunut Unicef Danmarkillu suleqatigiinnerisigut pilersinneqartoq, ukiunilu tallimani atuuttussaq. Suliniutip siunertaaasa ilagivaat meeqqat inuusuttullu pisinnaatitaaffiisa Nunatsinni ilisimaneqarnerulernissaat.
