Kommuneqarfik Sermersooq meeqqat isummersorfiinik pilersitsilersoq
Suliniut taaguuteqartoq "Uagut ulluinnarput - uagut niperput" kommunini sisamaasuni Meeqqat Isummersorfiinik pilersitsinissamik siunertaqarpoq. NAKUUSA tusagassiorfinnut nalunaaruteqarluni taama allappoq.
Meeqqat Isummersorfii 13-it 18-illu akornanni ukiulinnik qulinit 15-inut amerlassuseqartunik ilaasortaqassapput. Aamma meeqqat atuartut angerlarsimaffiini najugaqartut Meeqqat Isummersorfiinut peqataanissaannut kajumissaarneqarput, taamaaliornikkut kommunit illoqarfii nunaqarfiilu tamarmik sinniisuutitaqarniassammata.
NAKUUSA-p aamma kommunit suleqatigalugit atuarfinni 81-isuni siunnersuisoqatigiinnik Nakuusaaqqanik taaguuteqartunik pilersitsiniarpoq. Nakuusaaqqat meeqqat pisinnaatitaaffii tunngavigalugit suliassanik aaqqissuussisassasut, NAKUUSA aamma allappoq.
Aamma atuaruk Qeqqata Kommunia meeqqat isummersorfiannik pilersitsisoq
NAKUUSA-p Qeqqata Kommunia suleqatigiinnissamik marsip qaammataani isumaqatigiissuteqarfigaa. Kommuneqarfik Sermersoorlu ullumi ataasinngornermi apriilip aqqarngani isumaqatigiissuteqarfigineqartussanngorpoq, NAKUUSA-mullu isumaqatigiissut borgmester Asii Chemnitz Narupip nalunaaqutaq 12.30 atsiussavaa.
Suliniut "Uagut ulluinnarput - uagut niperput" meeqqat inuiaqatigiinni peqataanissaannik aamma tamat oqartussaaqataanerisa ingerlanneqarnerani eqeersimaartunik peqataanissaannik siunertaqarpoq.
- Kikkut tamarmik suleqatigiippata peqataallutillu, Nunarput peroriartorfigissallu pitsaanerulersinneqarsinnaavoq. Aamma kommuninit tikilluaqqusaalluarnerput nuannaarutigeqaarput, NAKUUSA-mi suliniutinik aqutsisoq, Najaaraq Møller, taama oqarpoq.