NUUMMIIT NUUNNEQ Sermersuumi IA siunnersuummut isornartorsiuipput
Borgmesterit kissaataat toqqissisimajunnaartitsisoq, nuussuiniaannarlunilu nussuineq pisariaqarnanilu akisussasoq, Inuit Ataqatigiit tusagassiutinut nalunaarummi allapput.
- Borgmesterit pingasut kissaataat pineqaannaraluartoq, tassa aalajangiinertaqanngikkaluartoq, ilaqutariippassuit patsisissalimmik ernumalerlutillu toqqissisimajunnaarput. Toqqissisimajunnaarnerup ilaqutariit allatuulli nunatsinniit nuunnissamik eqqarsalersissinnaavaat. Tassami - taamaasillutik Nuummiit nuussapput, tamannalu borgmesterit pingasut taakkua tassa nuannaarutigiinnassanerpaat?, Kommuneqarfik Sermersuumi Inuit Ataqatigiit gruppianni siulittaasoq, Mille Søvndahl allappoq.
Aamma atuaruk Roger Buch: Sulisut nuuppata kommunimut iluaqutaanerpaassaaq
Borgmesterillu siunnersuutertik qanoq akeqarnissaanik missingersuusiunnginnerat taassuma aamma isornartorsiorpaa.
- Allaat atorfinitsitsiniarnissanut, sumiiffikkaartumik sulisussatut piukkunnartunik ujartuinissamut ataatsimullu isigalugu suliassap qanoq naleqarnissaanik eqqarsaatersortoqarsimanani. Tassaaginnarpoq sumiiffinnik illersuineq takussutissiatigut kisitsisitigullu toqqorterneqarsimasoq, Mille Søvndahl allappoq.
Aamma atuaruk Nuutsitsinissamut siunnersuut itigartippaat
Kommuneqarfik Sermersuumi Inuit Ataqatigiit borgmesterit siunnersuutaannut sakkortuumik isornartorsiuigaluarlutik, akisussaaffinnik kommuninut tunniussinissamut siunnersuut isumaqatigaat.
- Kommuninik aaqqissuusseqqinneq kommunit 18-iniit sisamaanngortinneqarnerannik kinguneqartoq isumaqassappat, kommunit nammineersinnaanerat annertusassavarput. Inuiaqatigiit allaffissorfigineqarnerisigut ineriartortitsinikkullu maannamiit sukkanerusumik akisussaaffimmik annernerusumik kommunit tigusisariaqarput, Kommuneqarfik Sermersuumi Inuit Ataqatigiit tusagassiuutinut nalunaarumminni allapput.