Sermersooq: Ulloq unnuarlu paaqqinnittarfiit akisuallaarput
Isumaginninrnermut, suliffeqarnermut inuussutissarsiornermullu ataatsimiititaliaa kommunip aningaasaqarnermut ataatsimiititaliaanut innersuussutigaa, pisariaqartoq 4 millioner koruunit sinnilaarlugit naatsorsuutiniit amerlanerusunik aningaasartuuteqartariaqassasoq.
Kanukokami isumaqatigiinniarnerni akit qaffasissut
Tamanna pisariaqalersimavoq kommunit kattuffiat Kanukoka aqqutigalugu isumaqatigiinniarnerni akit qaffasissut atorneqarsimammata. Isumaqatigiissutit tamakku illoqarfiup annersaata neriuutigaa ungasinngitsukkut atorunnaarsinnaajumaarlugit.
- Akinik qaffaanissamik kinguneqartumik isumaqatiginninniartoqarsimavoq, imalu annertutigaat allaat naatsorsorsinnaallutigu politikerigut ilisimatittariaqarlugit amerlanernik aningaasartuuteqartariaqassalluta. Kommuneqarfik Sermersuumi meeqqanut, ilaqutariinnut atuarfeqarnermullu immikkoortortami pisortaq nassuiaavoq.
4,4 millioner koruuninik amerlanerusunik aningaasaliissasoq
Kommunip Isumaginninnermut, suliffeqarnermut inuussutissarsiornermullu ataatsimiititaliaata aningaasaqarnermut ataatsimiititaliaanut innersuussutigaa 4,4 millioner koruuninik amerlanerusunik aningaasaliissasoq. Aalajangigassaq tamanna Kommuneqarfik Sermersuumut sakkortussaaq, taamaattumik Søren Valbakip naatsorsuutigaa kommuni nammineq ulloq unnuarlu angerlarsimaffiliortitsinissaa.
- Ilimagaara aningaasaqarnermut ataatsimiititaliap oqarfigissagaatigut, ulloq unnuarlu angerlarsimaffinnik amerlanerusunik pilersitsissasugut, taamaalilluta nammineq akit aalajangiiffigisarniassagatsigit. Sermersuumi meeqqanut, atuarfinnut ilaqutariinnullu pisortaq taama oqarpoq.
Aamma atuaruk Meeqqanut inuusuttuaqqallu inissinneqartunut aningaarsartuuterpassuit
Naatsorsuutigaalu kommuni nammineq ulloq unnuarlu angerlarsimaffinnut akinik isumaqatigiinninniartalissasoq, maannakkummi Kanukoka kommuni sinnerlugu isumaqatinninniartarpoq.