Meeqqanut inuusuttuaqqallu inissinneqartunut aningaarsartuuterpassuit
- Angerlarsimaffiup avataanut inissiisarneq arlalinnik peqquteqarpoq, meeqqanut ilaqutariinnut atuarfeqarfinnullu ingerlatsivimmi pisortaq taama oqarpoq.
Søren Valbakip nalilerpaa, peqqutinut ilaasuni siulleq tassaasoq, siornatigut kommunip meeqqanut ikiorsiinissamut neqeroorutinik amigaateqartarnera, aappaattulli sulisorisat ilinniarsimasut amerliartornerisa kingunerigaat taakkua illoqarfiit nunaqarfiillu amerlanerit tikittalernerisa meeqqat ajornartorsiortut amerlanerit paasisaramikkit.
Kommunimut kalerriutigineqartartut amerliartorput
Pingajuattulli meeqqat ajornartorsiorneri pillugit kommunimut kalerriutigineqartarneri amerliartormata.
- Inuiaqatigiit akisussaaffimmik tigusinerulersut takusinnaavarput, Søren Valbak oqarpoq.
- Naggataatigullu oqartoqarsinnaavoq ilaqutariit sanngiitsut artorsaateqarneruleqqapput. Taamaattumik pissakitsut pisuullu assigiinnginnerat annertunerulerpoq, Meeqqanut ilaqutariinnut atuarfeqarnermullu ingerlatsivimmi pisortaq Søren Valbak taama oqarpoq.
Meeqqanut tungasuni ingerlatsineq misissueqqissaarinerup novembarimi saqqummertup millionerpassuit atorneqartut amerlisut takutippaa.
Tapiissuteqarnissaq kommunalbestyrelsemi aalajangiunneqarpoq
118 million koruunit 2014-mut aningaasaliissutaasut ukiaq 50 million koruuninik tapiissuteqarnissaq kommunalbestyrelsemi aalianngiunneqarpoq. Meeqqanut inuusuttunullu aningaasartuutit 168 million koruunit pallippai.
Taakkuali 70 procentii- tassa 102 million koruunit missaanniiittut ulloq unnuarlu meeqqanut inissiisarfinnut atorneqartarput. 25 million koruuninillu aningaasartuuteqarnerulerneq nutaajuvoq, namminersorlutik oqartussat aningaasanik akiliisarnermut maleruagassat allanngortimmagit kommunit aningaasartuutit tamakkiisumik ingerlatilerneranut kinguneqartoq.
Meeqqat 80-it maanna inissiisarfinni namminersortunit pigineqartuniipput, qaammammullu 80.000 koruuniniit 120.000 koruunit tungaannut akeqarlutik.
- Millionerpassuit sumut pisarneranut tamakku tassa peqqutit ilagaat, pisortaq taama oqarpoq.
- Ulloq unnuarlu inissiisarfiit namminersortut akitsoriartornerat takusinnaavarput. Inissiinissamut isumaqatigiinniarnerni akiuussinnaanerunissarput eqqumaffigineruligassatta ilagaat.
Kommune suliniutinik suliaqarpoq
Ukiup uumap aallartinnerani ajornartorsiutip aaqqiissuteqarfiginissaa anguniarlugu kommuni suliniutinik ingerlatallu ineriartorteqqinnissaanik suliaqarniartoq, Søren Valbakip oqaatigaa.
- Soorlu inissaaleqineq anigorniarlugu ilaqutariit inissaannik pissarsinikkut, meeqqanik arsaarinata ilaqutariit tapersersorlugit.
Kommuneqarfik Sermersuumi Meeqqanut, Ilaqutariinnut Atuarfeqarnermullu ingerlatsivimmi pisortaq, Søren Valbak taama oqarpoq.
Kommuneqarfik Sermersooq 2015-mut meeqqanut inuusuttunullu ikiorsiissutinut tunngasuni 188,5 million koruuninik aningaasartuuteqarnissamik missingersuuisiorsimavoq.