Sermersuumi siunnersorti pilersaarutinik arlalinnik iluatsinngitsuugaqartoq
Vingep qiterpasissuani nutaamik illoqarfiliornissamut 2013-imili siunnersuinerminut 8,4 millioner koruunit akissarsiarisimavai. Per Bendixip suliffeqarfiutaata Bendix Consutingip aamma viinneerniarnermik ingerlataqartup aningaasat kingulliit siorna decembarimi akissarsiarai.
Illoqarfissaq 2035-imi 20.000-inik amerlanernik innuttaqalersussaagaluarpoq. Pilersaarulli DR-ip qulaajaaneratigut millionerpassuarnik ajunaarutaalluni unitsiinnarneqarpoq. Vingiinnarmili Per Bendix pilersaarumminik ajutooruteqanngilaq.
AAMMA ATUARUK Siunnersorti kusanaatsulianit eqqugaasoq ingerlatsisumit atorneqanngitsoq
Pilersaarutinik arlariinnik iluatsinngitsuugaqartoq
Køge Parkimi timersortarfittaarnissamut aningaasaliisussarsioraluarpoq. Pilersaarulli taanna 2015-imi aningaasatigut nalornisoormat taamaatiinnarneqarpoq. Suliamut atatillugu Per Bendix isornartorsiorneqarsimasoq Niels Rolskov, Køgep Kommuniani Enhedsliste sinnerlugu ilaasortaasoq oqaluttuarpoq.
- Naapinneri tamaasa nutaanik pilersaaruteqartarpoq ilaannikkullu taamaatitsisoqaraangat nutaat takkuttoqartarluni, Roldskov DR-imut oqaluttuarpoq.
AAMMA ATUARUK Siunnersorti pilersaarummi allami ajutooreernikuuvoq
Siunnersorneqarluarsimanngitsoq
Kommuni iluamik siunnersorneqarsimanngitsoq, Roskilde Universitetimi professori Bent Greve taama oqarpoq.
- Kommunip aningaasaliissutini pissarsissutigisimarpasinngilai. Soorlumi inuup taassuma kommunip pissarsinissaa isumannaarsimanngikkaa, Bent Greve DR Københavnimut oqarpoq.
AAMMA ATUARUK Namminersortunik suleqateqarneq akisusinnaaqisoq
Aammattaaq Frederikssund Kommunimi politikerinit Per Bendixip sulinera iluarineqanngilaq.
- Atorsimammassuk tupigusuutigaara. Qarasaasiakkut uanga alakkarakku soorlu paasillugu allat taamaaliorsimanngitsut, apeqqusigassaqarpormi, Niels Martin Viuff oqarpoq. Socialdemokratiet sinnerlugu kommunimut ilaasortanngorlaaq DR Københavnimut taama oqarpoq.
Isornartorsiutigineqartoq pillugu DR-ip Per Bendiximut saqqummiuppaa, isornartorsiutigineqartorli pillugu Bendixen oqaaseqarusussimanngilaq, nipangiussisussaatitaaneq innersuussutigalugu.
