Siunnersorti pilersaarummi allami ajutooreernikuuvoq
Kommuneqarfik Sermersuup ineriartortitsinissamik pilersaaruteqarnermini Per Bendix siunnersortitut atorfeqartippaat.
Per Bendixip Køgemi pilersaarut 650 millionit koruuninik naleqartoq aamma suliaraa. Pilersaarulli ukiut arlallit suliarineqartoq, 2015-imi unitsiinnarneqarpoq.
- Køgep kommuneata arsaattarfittaassamut aningaasaliisinnaasussat attartorsinnaasullu oqaloqatigileruttorpai, TV2 2013-ip naanerani taama oqaluttuarpoq.
Køge Parkimulli pilersaarut ukiut marluk qaangiummata unitsinneqarpoq.
Borgmesterip tullersortaa: Pisinnaasarput qaangerparput
Køgemi kommunalbestyrelse ukiuni arfineq marlunni suliani 2015-imi taamaatiinnarmagu
pisinnaasani sinnerlugu pilersaarusiuleraluarsimasoq, borgmesterip tullersortaata, Maria Stærkep TV2 Lorrymut nassuerutigaa.
Køgemi kommunalbestyrelsemut ilaasortap Enhedslistenimeersup Niels Rolskovip suliaq tukattumik suliarineqarsoraa, tassami aningaasalerneqarnissaa piariilivinnerarneqaqattaarpoq.
AAMMA ATUARUK Aningaasaliisussat kikkuunersut Sermersuumit oqaatigineqarusunngitsoq
- Taamani tusartuarparput pilersaarummut soqutiginnittorpassuusut, aningaasaleerusuttorpassuillu amerlagaarmata eqqortumik toqqaanissaq apeqqutaaginnartoq, Niels Rolskov oqarpoq.
Køge Parkimut pilersaarut partiinit Enhedslistenimit Liberal Alliancemillu aallaqqaammulli akerlerineqarpoq. Arsaattarfimmik sananissap saniatigut inuussutissarsiortut illoqarfimmi immikkoortussaannik sananissaq pilersaarummi ilaapput.
Bendix: Politikerit pilersaarummut piumasaqaqattaarput
Nuummi ineriartortitsinissamik pilersaarummi arsaattarfissaarsuaq, 4-5 milliardit koruunit missaannik akeqartussaq tassunga assingusoq, Kommuneqarfik Sermersuup marlunngormat saqqummiuppaa.
Kommuneqarfik Sermersuup Per Bendix Køgemi arsaattarfissualiassamut pilersaarutaasimagaluartumi suliaqarsimasoq pilersaarusiormut nutaamut suliaqartileraluaraa, pilersaarusiat taakku marluk sanileriisinneqarsinnaanngitsut, Per Bendix isumaqarpoq, Køgemilu politikerit pilersaarummik piviusunngortitsinngitsoornermut namminneq pisuussuteqarnerarlugit.
- Koreamiut hockeytarnerannut assinguvoq, tassani isertitsivissaq nikisinneqaqattaartarpoq. Pilersaarusiortut kommunimut annerusumik piumasaqaqattaanngillat, paarlattuaninguna, Per Bendix oqarpoq.
Nuummi illoqarfimmik ineriartorttsinissamik pilersaarut kommunalbestyrelsemi tamanit isumaqatigiissutigineqarlunilu taperserneqartoq, Per Bendixip erseqqissaatigaa.
