Aningaasaliisussat kikkuunersut Sermersuumit oqaatigineqarusunngitsoq

- Ingerlatseqatigiimmik ataatsimoortumik pilersitsiniarpugut, tassaniittullu ilaasa aningaasaqarnermut tunngasut isumagissavaat allallu sanaartorneq isumagissallugu,Kommuneqarfik Sermersuumi kommunaldirektøriugallartoq Lars Møller Sørensen oqarpoq.

Taannalu naapertorlugu Danmarkimit aningaasaliisartunit akuersaarpaluttunik ersertoqarpoq. Sorliunersulli oqaatigerusunngilai.
- Piumagaluaruma oqaatigisinnaagaluarpara, Lars Møller Sørensen oqarpoq.

Ataatsimoortumik suliariumannittussarsiuussisoqarniartoq

Suliniummut ataatsimoortumik suliariumannittussarsiuussisoqarumaartoq, taassumalu ukiumi massumani piareernissaa kommunimit naatsorsuutigineqartoq, Sørensen oqarpoq.
 
4-5 milliardit koruunit missaannik naleqartunut suliariumannittussarsiuussinermi ilaatigut atuarfiit nutaat, paaqqinnittarfiit, arsaattarfissuaq kiisalu illoqarfiup ilassaa nutaaq taassumalu tungaanut sullorsuaq ilaassapput.

- Ukiaru suliariumannittussarsiuussinertut suliarineqarnissaat sulissutigaarput, Lars Møller Sørensen oqarpoq.
Kommunaldirektøriugallartoq naapertorlugu illoqarfiup ilanissaanut suliniut iluatsissappat inuit 4500-t missaat Nuummut ukiut arfineq-pingasut ingerlanerini nuuttariaqarput.

Nuummulli nuuttussat 3000-it angunavianngikkaat Naatsorsueqqissaartarfimmit naatsorsuutigineqarpoq. Illoqarfiulli ilaneqarneratigut inuit amerlanerusut nuukkusulissasut kommuni isumaqarpoq.

Sullorsuaq 440 millionit koruuninik akeqarsinnaasoq

Aningaasaliisut namminersortut arlallit ataatsilluunniit illoqarfiup ilaani nutaami 1600-nik inissialiornissamik pisinnaattaaffeqarusullutik Ukkusissakkut sullorsuup sananeqarnissaa isumagissagaat kommunip takorloorpaa.

- Sullorsuaq sanagunikku illussanik sanaartornissamut periarfissaqalissapput kingornalu inissiat 1600-ut tuniniarsinnaavaat attartortillugilluunniit, Lars Møller Sørensen oqarpoq.

Illoqarfiup ilaani nutaami ineqarnermut akilitissat sullorsuarmut inissiamullu aningaasaliissutaasussaagaluartut, nuuttussat ineqarnerminnut akiliisinnaassasut, Lars Møller Sørensen isumaqarpoq.

Sullorsuup 440 millionit koruunit tungaannut akeqarsinnanissaa naatsorsuutigineqarpoq.

Sullorsuassarmi 900 meterit 1300 meterillu akornanni takissuseqarsinnaassaaq, qaqqallu sullorsualiorfigineqarnissaanut qanoq naleqqutsiginersoq suli ilisimaneqanngilaq:

- Qaqqap qanoq innera putooriffiginissaalu qanoq ajornartiginersoq apeqqutaalluinnarpoq, Lars Møller Sørensen oqarpoq.