Illoqarfiit pingaarnersaat pillugu tamarmiusumit taperserneqarpoq

Nuup allilernissaanut pilersaarut, ilaatigut Ukkusissat akianni 5000-inik innuttaasulimmik illoqarfiup ilalernissaanik imalik Siumumit, Atassummit, Demokraatinit Inuit Ataqatigiinniillu kommunalbestyrelsimut ilaasortat katillugit 19-iusut tassa tapersiippuit.

- Tapersersorparput. Tamavitta ataatsimilluunniit minitaqarata, Kommuneqarfik Sermersuumi borgmesterip sinniisussaata aappaa, Siumumeersoq Ane Egede Mathæussen taama oqarpoq, nangillunilu:
- Inissaaleqinermut tunngasut, aammalu meeqqerivinnut atuarfeqarnermut, atuarnerullu kingorna ornittagassanik sanaartortoqassagami. Aamma sanaartorfiusut sanaartortitsisullu pinngitsooratik ilinniartariaqartut aamma oqaatigiuarparput.

AAMMA ATUARUK Illoqarfiit pingaarnersaannut pilersaarusiaq ineriartortitsissaaq

Isumaqatigiinneq pingaarpoq

Borgmester Asii Chemnitz Narup naapertorlugu kommunalbestyresip tamarmiusup pilersaarummut tapersiinera pingaartupilussuuvoq.

- Pingaartupilussuuvoq. Pingaartumik aningaasaliinissamut soqutiginnissinnaasut apeqqummut tamatuminnga eqqummaarittorujussuusarmata, Asii Chemnitz Narup taama oqarpoq.

Kommuninulli qinersinerup kingorna allamik borgmestereqalersimappat suliniutip naammassiniaannarneqarnissaa maanna borgmesteriusup neriorsuutigisinnaanngikkaluarlugu susoqaraluarpalluunniit suliniutip nanginneqarnissaa neriuutigaa.

- Neriuutigingaarpara, uungarpareerluta ajalusoortoqassappat akueriuminaattorujussuussammat. Aammalu partiimi ilaasortaanerput apeqqutaatinnagu maannamut suleqatigiissimanerput attanneqaqqissaartariaqartutut aamma aprilip sisamaata kingorna kissaatigingaassavara, Kommuneqarfik Sermersuumi borgmesteri Asii Chemnitz Narup taama oqarpoq.

AAMMA ATUARUK Issittumi arsaattarfissuassaq tusaamasamit titartarneqassasoq