Illoqarfiit pingaarnersaannut pilersaarusiaq ineriartortitsissaaq
Illoqarfiit pingaarnersaannut iliuusissatut pilersaarut naapertorlugu, Nuuk 2030-mi 30.000-inik inoqalissaaq. Kommunip naatsorsuuteqarneratut Nuummut siunissami nuuttussat inissaqartinnissaannut illoqarfik ilaneqartariaqarpoq.
Illoqarfiup ilassaa Qinngorput Kangerluarsunnguullu akornanniissaaq, Kommunelu naapertorlugu ukiuni arfineq pingasuni sanaartortoqareerpat, inuit 5000-it inissaqalissapput. Taamaammat illoqarfiup ilassaa atuarfeqarluni paaqqinnittarfeqassasoq, kommunip aamma pilersaarutigaa.
Illoqarfiup ilassaa Nuup ilaanut sullorsualerlugu aqqusinniorneqassaaq tamannalu kilometeri sinnerlugu takissuseqassaaq. Pilersaarullu naapertorlugu tamanna Kangerluarsunnguamut aqqut siulliussaaq.
AAMMA ATUARUK Nuummi innuttaasut ukiut 13-it qaangiuppata 30.000-it
Ineriartortitsineq illoqarfimmut tamarmut iluaqutaassaaq
Siunissami ineriartortitsinissaq illoqarfiup ilaneqarnerinnaaniinngilaq. Pilersaarusiap saqqummiunneqarnerani atuarfinnik nutaanik marlunnik sanaartortoqassasoq aamma eqqaaneqarpoq. Atuarfissap aappaa Qinngorpumiissaaq atuarfissallu aappaata atuarfiit Samuel Kleischmidt Ukaliusarlu illoqarfimmi pisoqaanerpaat ilaanniittut taarsissavai.
Illoqarfissuarmut pilersaarut ilaatigut ataqatigiissaarinerni, kommunini suliffisaqarfinnut, inissianillu sanaartornissarujussuarmut aningaasaliinerujussuartaqaraluartoq, Kommuneqarfik Sermersuup aalajanngersimaffigaa tamanna kommunip aningaasaliiffigissanngikkaa.
Pilersaarut suliffeqarfimmit piginneqatigiiffimmit pensionskassemit aningaasaliiffigineqassaaq, tamannalu kommunip ukiup naalernerani isumaqatigiissutiginissaa neriuutigaa.
Allatut taallugu aningaasaateqarfiit namminersortut sanaartornernut akiliissapput kingornatigullu kommunimut attartortinneqassallutik.
Pilersaarut pillugu Kommuneqarfik Sermersuup nittartagaliaa uani takuneqarsinnaavoq.
AAMMA ATUARUK Inuit Ataqatigiit periusissiamut tapersiipput
