Inuit Ataqatigiit periusissiamut tapersiipput
- Kommunit allat aamma Kommuneqarfik Sermersuup iliorneratut pilersaarusiortariaqarput, taava taamaasilluta Nunatsinnit nuuttartut unitsissinnaassagatsigit, Qeqqata Kommuniata kommunalbestyrelseani ilaasortaq, Inuit Ataqatigiinneersoq, Nuka Berthelsen, oqarpoq.
AAMMA ATUARUK Nuummi innuttaasut ukiut 13-it qaangiuppata 30.000-it
Nunatsinni innuttaasut ukiut 15-it qaangiuppata ikinnerulissasut, Naatsorsueqqissaartarfiup kisitsisaataani ersippoq.
Taamaammat Kommuneqarfik Sermersooq Nuummi innuttaasut ukioq 2030-mi marloriaatinngorsimanissaat aallaavigalugu periusissiorpoq.
- Kalaalerpassuit aamma nunani allani ilinniartut taakkua naammassigunik angerlarnissaannut pilerisaarnerusinnaasorigatsigit Nuup illoqarfiata nuannersumik ineriartortikkutsigu, Kommuneqarfik Sermersuumi borgmesteri Inuit Ataqatigiinneersorlu Asii Chemnitz Narup KNR-imut januaarimi oqarpoq.
Periusissiami allassimavoq, Nuuk allineqarlunilu sanaartorfigineqassasoq, ilaatigut suliffeqarfinnik pilersitsinikkut.
AAMMA ATUARUK Hovedstadsstrategi mødt med skepsis af andre kommuner
Kommune Kujallermi borgmesteri Jørgen Wæver Johansen periusissiornermut isumaqataagaluarluni, taamak inoqqortutigilersinnaanissaa piviusorsiorsorinngilaa.
Kisianni periusissiaq piviusunngorpat kommunit allat inukilliartulissasut, Qeqqata Kommuniani borgmesteri Hermann Berthelsen aamma Qaasuitsup Kommuniani borgmesterip tullersortaa Jess Svane ernumapput.
- Nutserarneq nunarsuarmi sumiluunniit pivoq, qallunaat nunaannut aamma nuuttarput. Imaanngilaq Nuuk kisiat nutserarfiusoq, Kommune Kujalliup kommunalbestyrelseani ilaasortaq Inuit Ataqatigiinneersorlu Stina Egede, oqarpoq.
Taassuma Qeqqata Kommuniani kommunalbestyrelsemi ilaasortaq, Nuka Berthelsen, isumaqatigaa:
- Uagut kommunit allat taanna (periusissiaq, aaqq.) ilinniarfigisariaqarparput. Inissaaleqineq massakut sumi tamaani atuuppoq. Taamaammat pisariaqarpoq siunissamut ungasissumut eqqarsarluta piareersarnissarput.
