Illoqarfiit pingaarnersaata periusissiaa Hansenip Kirkegaardillu taperserpaat
Illoqarfiit pingaarnersaata periusissiaanik 2030-imilu 30.000-inik innuttaasoqalernissaanik anguniagaqarneranik Qeqqata Kommuniani borgmesterip Siumumeersup Hermann Berthelsenip isornartorsiunerata kingorna taama nalunaaruteqarput.
Taamatut anguniagaqartoqarneratigut inoqarfinnik inuerusaasoqarnissaa borgmesterip aarleqqutigaa.
Siumumeersup Jens Erik Kirkegaardip illoqarfiit pingaarnersaata periusissiaa illersorpaa. Nunarput namminiilivikkuni illoqarfiit pingaarnersaannik nukittuumik pisariaqartitsissasoq erseqqissaatigalugu. Aamma innuttaasut illoqarfinnut noorarnerat tikkuarpaa.
- Tamanna isiginngitsuusaarsinnaavarput imaluunniit akueralugu siunissamut eqqanaarsarluta, Siumup politikkikkut oqaaseqartartua taama oqarpoq.
AAMMA ATUARUK Hovedstadsstrategi mødt med skepsis af andre kommuner
Demokraatit sinnerlugit Sermersuumi kommunalbestyrelsimut ilaasortap Justus Hansenip aamma oqaatigaa kommunalbestyrelsi ajorniarluni pilersaarusiorsimanngitsoq, Nuummili Tasiilamilu ineriartorneq takusinnaasartik najoqqutaralugu iliuuseqaannarlutik.
- Nunani tamani inuit illoqarfinnut noorarput, taamaammat illoqarfiit malinnaasinnaajunnaaqqunagit kommunit alliartornissaminnut periusissiorlutik tamanna piareersimaffigisariaqarpaat. Sermersooq matumani maligassiuerusuppoq, tamannalu kommunalbestyrelsip tamarmiusup isumaqatigiissutigaa, Justus Hansen taama oqarpoq.
AAMMA ATUARUK Nuummi innuttaasut ukiut 13-it qaangiuppata 30.000-it
Taamaammat Kirkegaard aamma Hansen isumaqarput Hermann Berthelsen paasinerluisimasoq, Nuummummi maannakkorpiaq nutsertut amerlasuupilussuupput, tamannalu pissutigalugu illoqarfik innuttaasunit nutaanit tatineqaqqunagu periusissiortoqartariaqartoq.
