Namminersortunik suleqateqarneq akisusinnaaqisoq
Kommuneqarfik Sermersooq atuarfinnik nutaanik namminersortut akiligaannik sanaartortitserusuppoq.
Nuummi atuarfiit marluk ASK USK-ilu atuarfimmik angisuumik, 1200-nik atuartoqarsinnaasumik, taarserniarneqarput.
Kommunip sanaartortitsinissaminut aningaasat pingajorarterutai pigereerpai, aningasartuutissallu pingajorarterutai marluk sinneruttut aningaasaliisartunit namminersortunit isumagineqarnissaat naatsorsuutigalugu. Namminersortut sanaartorlutillu aserfallatsaaliissapput.
Tamannali akisusinnaaqisoq, immikkut ilisimasalik isumaqarpoq.
- Isumaqarpugut aaqqissuussaq, pisortat namminersortullu suleqatigiinnerat, OPP, atoraanni akisunerulaassasoq. OPP-milli aaqqiissuteqarneq aserfallakkartunngitsumik atuarfeqalernissamik sanaartortitseqqittariaqalinnginnissamillu qularnaarinninneruvoq, Kommuneqarfik Sermersuumi pisortaagallartoq, Lars Møller Sørensen, oqarpoq.
Ineqarnermut akiliummut assersuutigineqarsinnaasoq
Kommunip illoqarfiup ilassaanik sanaartortitsiniarnermini siunnersortaa, Per Bendix, naapertorlugu, atuarfittaassanut paaqqinnittarfittaassanullu kommunip aningaasaliissutip pingajorarterutaanik ingerlaannarluni akiliisarnissaa pilersaarutaavoq.
- Taava akimut ataatsimut atuarfeqalissaaq paaqqinnittarfeqalerlunilu, Per Bendix oqarpoq.
Aki taanna ineqarnermut akiliummut assersuutigineqarsinnaavoq, kommuni aningaasaliisartunut ukiuni 30-ni akiliuteqartassalluni.
Akiliut aningaasaliisut aningaasaliissutiminnik utertitsinerannut, aserfallatsaaliinermi aningaasartuutinut aningaasaliisullu iluanaaruteqarnerannut naapertuutissaq.
Kommuneqarfik Sermersuup sanaartortitsinissaminut OPP-mik suleqateqarnera imaassaaq:
- Atuarfiit paaqqinnittarfiillu nutaat sanaartorneqarneri 1 aamma1,5 milliard koruunit akornanni akeqassangatinneqarput.
- Kommunip aningaasartuutissat 35 procentii akilissavai - sinneruttut aningaaaliisartunit namminersortunit isumagineqarnissaat naatsorsuutigineqarpoq.
- Namminersortut sanaartorlutillu aserfallatsaaliissapput.
- Taava kommuni assersuutigalugu atuarfimmik atuinermini akiliisassaaq.
- Tassalu akiliut aningaasaliissutinik, utertitsitsissutissanut aserfallatsaaliinermut iluanaarutinullu naapertuutissaaq.
Najoqqutaq: Kommunip illoqarfiup ilassaanik sanaartortitsiniarnermini siunnersortaa, Per Bendix.
Politikerit ussernartorsiutigisinnaagaat
OPP atorlugu suleqateqarneq pitsaaquteqarlunilu pitsaanngequteqartoq, Roskilde Universitetimi professori, OPP-mik ilisimatooq, Ole Helby Petersen, nassuiaavoq:
- OPP-mik periarfissaq tassaavoq, aningaasat atorsinnaanngikkaluakkat atorsinnaanerisigut maannakkorluinnaq sanaartortitsinissaq.
Akissaqanngikkaluarluni taamatut periarfissinneqarneq politikerit ussernartorsiutigisinnaagaat, aammali kommunit aningaasaqarneranik allanngortitsisuunngitsoq, taanna oqarpoq.
- OPP atoraanni inuiaqatigiinni akissaqarnerulersitsisussatut isigissallugu takorluuineruvoq. Kaasarfik ataasiinnaq aningaasanik aallerfiussaaq, tassalu akileraartartut aningaasaataannit, Ole Helby Petersen oqarpoq.
Kommuneqarfik Sermersooq sutigut OPP-mik suleqatiginninniarnersoq, borgmester Asii Chemnitz Narupip nassuiaanera Qanoruumi unnugu 19:00 takusinnaavat.
