Meeqqat unnuariat: Serlersaarisut tillinniallu nunatsinni naalliuutaasut
Oktobarip aallaqqaataata kingornali oqaluttuatta ilarpaalui politiit inuusuttut ukiukitsullu unnukkut unnuamilu pinerlussimasut pillugit ullormut nalunaarusiaannik aallaaveqarput.
Politiit suliaat taakku amerlanerpaartaat serlersaarinermut tillinniarnermullu tunngasuupput. Taakku ulluni makkunani ajornartorsiutaaqisut, politiit uppernarsaapput.
- Tillinniarfigineqartunut serlersaarfigineqartunullu piffissami kingullermi ornigutilertukkajuttugut taakkunanilu pinerlussimasut ilaat inuusuttuullutillu ilumoorpoq, politikommissæri Nuummi politiit ulapungaarsimasuisa ittuat Andreas Rem Nordentoft oqarpoq.
Pisarnerminngarnit angalaaqatigeeqarnerusoq
Ingammik serlersaarinerit piffissami kingullermi tusarsaaqisut, Toqqissisimanissaq pillugu Nuummi biilerlutik unnukkut unnuamilu angalaaqatigiittartut aamma maluginiarppaat.
Taamaammat toqqissisimanissaq pillugu pisarnerminngarnit ulluni makkunani angalaaqatigeeqarneruvoq.
- Serlersaarinerit piffissami kingullermi tusarsaaqimmata serlersaarinaveersaartitsiniarluta biilit marlukkuutaarlugit piffissami kingullermi angalaatigiittarpugut, Salik Hard oqarpoq. Taanna suliniut 2021-mi pilersitami Toqqissisimanissaq pillugu angalaaqatigiinneersuuvoq.
Inuusuttut illoqarfimmiitillutik toqqissisimaqqullugit akunnerminnilu qanoq pisoqarneranik arajutsiseqqunagit, suliniut “Toqqissisimanissaq pillugit angalaqatigiit” pilersinneqarpoq.
Nalunaarsugaat ilaliisut
Oktobarimi tillinniarnerit 14-isut, suliaannullu taakkununnga attuumassutillit meeraasut inuusuttuusulluunniit, politiit kisitsisaataanni erserpoq. Septembarimilu ataasiarluni tillinniartoqarsimavoq, suliamullu tassunga attuumassutillit tassaasut suli 15-iliineqanngitsoq aamma 15-it 17-illu akornanni ukiulik.
Taamaammat Nuummi politiit biilerlutik unnukkut unnuamilu angalaaqatigiittartutik aamma amerlivaat. Tassa tillinniarnerit serlersaarinerillu piffissami kingullermi ajornartorsiutaanerisa aaqqissinnaanissaat neriuutigalugu Toqqissisimanissaq pillugu angalaaqatigiillu taamaaliorput.
Aamma toqqissisimanissaq pillugu angalaaqatigeeqarnerulernera malugusunnartoq, politikommissæri oqarpoq.
- Sapaatit akunneri marluk-pingasut matuma siornatigutulli suli tillinniaqaqattaarlunilu serlersaarisoqaqattaarpoq. Taamaammat aqqusinermi unnukkut unnuamilu angalaarnerulerpugut, aamma Toqqissisimanissaq pillugu angalaaqatigeeqarnerulernera malugusunnarpoq. Isumaginnittoqarfillu suleqatigiilluarnerput tillinniarnerit serlerseerinerillu ajornartorsiutaajunnaarnissaannut iluaqutaassasoq neriuppugut, Andreas Rem Nordentoft oqarpoq.
