Politiit ullormut nalunaarusiaat: Ukiukitsut nakuusertutut, aserorterisutut tillinniartutullu pasineqartut
Igalaat aserorsimasut, biilinut iserniarnerit sumiiffinnilu arlalinni aserorterinerit politiinit marlunngornerup unnuaani naammattoorneqarput.
Taakkulu tamarmik eqimattamit ukiukitsunit qulit missaanniittunit arfineq-pingasunit 14-inut ukiulinnit iliuuserineqarput, Kalaallit Nunaanni Politiit pigaartuisa pisortaat, Jørgen Madsen paasissutissiivoq.
- Ukiukitsunut tunngatillugu pisoqarpoq, Nuummi atuarfiup Askip, kigutileriffiup Notabenellu igalaavi aserorsimapput. Tamatuma saniatigut eqimattat ukiukitsumut allamut aamma nakuusersimapput, eqimattat biilinut uninngasunut iserniarsimapput, pigaartut pisortaat oqarpoq.
Toqqissisimaneq pillugu angalaaqatigiit akuusut
Ukiukitsumut eqimattanut ilaanngitsumut allamut saassussineq Vinslottetip silataani pivoq, ukiukitsuniillu pingasut iliuuseqartuusutut pasineqarput, pigaartut pisortaat oqarpoq.
- Saassussineq qanoq ingasatsiginersoq maannakkut oqaatigisinnaanngilara, kisianni inuusuttut 15-it inorlugit ukioqartut, pillaatissinneqarsinnaanermut ukiui inuummata nalinginnaasumik pillaatissinneqarsinnaanngillat. Kisianni oqaloqatigissavagut, aamma kommunimit oqaloqatigineqassapput, Jørgen Madsen oqarpoq.
Pinerliffigineqartoq saassunneqarnermi kingorna politiinit angerlaanneqarsimavoq. Politiit eqimattat arlallit unnuap ingerlanerani aamma naammattoorpaat, angerlaallugillu, taanna oqarpoq.
Inuit pillaatissinneqarsinnaanermut ukiut killissarititaasut inorlugit ukioqartut pineqartillugit kommune ilanngunneqartarpoq. Taamaammat suliami matumani toqqissisimaneq pillugu angalaaqatigiit politiillu suleqatigiipput.
Politiinit kaammattuut ersarissoq
Nakuusernermi suliaq, tillinniarniarniarit, illoqarfimmilu sumiiffinni assigiinngitsuni aserorterinerit politiinit maanna misissorluarneqassapput. Biilillit biiliminnik unnuaanerani parnaaqqatitsinissartik piffissami aggersumi nakkutigilluassagaat pigaartut pisortaata unnuaq pisut pissutigalugit kaammattuutigaa.
- Biilinik piginnittunut kaammattuuteqarnerup saniatigut inuusuttunut angajoqqaanut aserorterineq, nakuuserneq tillinniarniarnerlu iliuuserineqartussaannginnerat pillugu meeqqaminnik oqaloqatiginneqqullugit kaammattuuteqarfigerusuppakka, pigaartut pisortaat oqarpoq.
Ukiukitsut biilinit tillinniarniarlutik iserniarsimanersut imaluunniit biilinik tillinniarsimanersut politiit suli ilisimanngilaat, kisianni misissuilluarnerminni tamanna paasissallugu neriuutigaat.
