- Københavnimi aallartitaqarfitsinniittup kinamiut aallartitaqarfiat pulaarpaa pisimasarlu pillugu oqaloqatigalugu. Illuatungeriit tamarmik pisoq ajuusaarutigingaatsiarpaat taamatullu pisoqqinnginnissaa neriuutigaarput, savalimmiormiut lagmandiat, Bárour Nielsen DR Nyhederimut oqarpoq.
Nipi immiussaq eqqartuussisumit inerteqquteqartitsinikkut saqqummersinneqanngilaq, taamaakkaluartorli Kinap nunanut allanut tunngatillugu politikkikkut iliuusaat pillugu Danmarkimi nunarsuarmilu politikkikkut isumaqatigiinnginnermik pilersitsivoq.
AAMMA ATUARUK Kinap aallartitaata Savalimmiunut siorasaarisoqarsimannginneraraa
Berlingskep DR-illu allaaserisaat naapertorlugu nipimi immiussami savalimmiormiut atavatangiinut inuussutissaqarnermullu ministeriata naalakkersuisoqarfiup pisortaata, Herálvur Joensenip akornanni oqaloqatigiinnermit immiussaavoq.
Naalakkersuisoqarfiup inuussutissaqarsiuutinut ministeri Savalimmiuni naalakkersuisut kinamiullu Danmarkimi aallartitaata, Feng Tie-ip akornanni ataatsimiinneq pillugu ilisimatippaa.
Savalimmiuni naalakkersuisoqarfiup pisortaata oqarnera naapertorlugu kinamiut aallartitaata kinamiut suliffeqarfiat, Huawei 5G-mut attaveqaatinik pisiortorfinngortinneqanngippat killilersugaanngitsumik niuernissamut isumaqatigiissuteqarnissaq savalimmiormiut puiguinnarsinnaagaat savalimmiuni lagmandimut siorasaarutigisimavaa.
AAMMA ATUARUK Ministerieqarfiup Savalimmiuni Huawei-imut tunngatillugu danskinit itigartitsisoqarsimannginneraraa
- Kinamiut aallartitaata eqikkaanerani ima oqartutut paasivara, taamaattoqanngippat taava aamma nieqatigiinnissamut isumaqatigiissuteqartoqassanngitsoq, Berlingske naapertorlugu naalakkersuisoqarfiup pisortaa oqarpoq.
Tamanna Danmarkimi oqallittoqangaatsialerneranik kinguneqarpoq nunarsuullu sinnerani aamma eqqartoqqinneqarpoq. Lagmandilli tamanna innarliisimanngissoraa.
- Innarliisimaneranik paasisaqanngilanga. Suliarli ajuusaarutigaara, taamatullu pisoqaqqinnginnissaa neriuutigalugu, Bárour Nielsen DR-imut oqarpoq.