Kinap aallartitaata Savalimmiunut siorasaarisoqarsimannginneraraa
Kinamiut Danmarkimut aallartitaat DR Nyhederimut e-mailikkut allappoq.
- Aallartitaqarfik siorasaarinngilaq, savalimmiullu tungaanniit naammagittaalliummik tusagaqarani, aallartitaq allappoq.
Kinamiut aallartitaata Feng Tie-ip Savalimmiut 5G-mik pisiortorfissarsiortoq kimigiiserfigisimagunaraa Berlingskep DR-illu allaaserereeraat aallartitaq taama nalunaaruteqarpoq.
AAMMA ATUARUK Ministerieqarfiup Savalimmiuni Huawei-imut tunngatillugu danskinit itigartitsisoqarsimannginneraraa
Berlingskep DR-illu allaaserisaat naapertorlugit tamanna nipimi immiussami tusaaneqarsinnaavoq.
Savalimmiormiut lagmandiat, Bárður á Steig Nielsen suliamut tassunga atatillugu kimigiiserfigineqartutut misigisimannginnerarpoq.
- Nunat marluk akornanni oqaloqatigiinneruvoq, tamannalu tamanit tusarneqarnissaa pisariaqanngilaq, Bárður á Steig Nielsen DR Nyhederimut oqarpoq.
- Uanga Savalimmiuniittulluunniit allat kinamiut aallartitaannik oqaloqatiginnittut piffissap arlaaniluunniit kimigiiserfigineqartutut misiginngilagut, savalimmiormiut lagmandiat oqarpoq.
AAMMA ATUARUK Kinap Savalimmiut Huawei-imut isumaqatigiissuteqarnissamut siorasaaraa
Suliaq immiussamut savalimmiormiut tusagassiorfiata Kringvarpip tigummisaanut tunngassuteqarpoq. Immiussaq savalimmiormiut lagmandiata kinamiullu aallartitaata novembarip ulluisa 11-anni ataatsimiinneranneersuuvoq.
Immiussami savalimmiormiut lagmandiata Bárdur Nielsenip kinamiullu aallartitaata Feng Tie-ip ataatsimiinnerisa imarisaa tusaaneqarsinnaavoq,
Immiussarli tusagassiorfimmit saqqummersinneqaqqusaanngilaq. Savalimmiormiummi naalakkersuisuisa eqqartuussisumit inerteqquteqartitsinissaq sapaatip akunnerata ataatsip matuma siorna aalajangerpaat - tamannalu Kringvarpip immiussamik tv-kkut saqqummersitsinissaanut minutsit 22-nnanngortut pivoq.