Ministerieqarfiup Savalimmiuni Huawei-imut tunngatillugu danskinit itigartitsisoqarsimannginneraraa

Nunanut allanut tunngasunut ministereqarfiup oqarnera naapertorlugu Danmarkip Savalimmiut Huawei-ip pisiortorfigineqannginnissaanik peqqussuteqarfiginngilaa. Nunanut allanut tunngasunut ministereqarfik tusagassiuutinut taama nalunaaruteqarpoq.
Savalimmiormiut attaveqaatinik pisiortorfissaminnik namminneq aalajangiisussaapput, danskit nunanut allanut ministeriata, Jeppe Kofodip tamanna erseqqissaatigaa. Nunanut allanut tunngasunut ministereqarfiup Danmarkip savalimmiormiunut Huawei-ip pisiortorfinngortinneqarnissaanut inerteqquteqarsimaneragaanera itigartitsissutigaa. Assi © : Scanpix
Allattoq Ritzau, Helle Nørrelund Sørensen
decembarip 11-at 2019 09:07
Nutserisoq Connie Fontain

Berlingskep allaaserisaa naapertorlugu Danmarkip Savalimmiut Huawei-ip attaveqaatinik pisiortorfigineqannginnissaanik siunnersorpaa. Tamatuma saniatigut Kinap Danmarkimut aallartitaata, Feng Tie-ip Huawei-ip 5G-mik pisiortorfinngortinneqarnissaa anguniarlugu savalimmiuni naalakkersuisuni qullersat siorasaaruteqarfigisimavai.

Huawei-imi toqqarneqanngippat Kinap Savalimmiunut killilersugaanngitsumik niueqatigiinnissamut isumaqatigiissuteqarnissaq taamaatiinnassagaa, Feng Tie-ip siorasaarutigisimagaa Berlingskep allaaseraa.

Nunanulli allanut tunngasunut ministereqarfiup Huawei-imik atuinissamut mianersoqqussuteqarsimaneragaanertik itigartitsissutigaa.

- Tusagassiuutini ”Illersornissamut ministereqarfiup Huawei-ip 5G-mut attaveqaatinik pisiortorfinngortinneqarnissaata toqqarneqarnissaa pitsaanerpaanaviannginneraraa danskit nunanut allanut tunngasunut ministereqarfiata Savalimmiuni naalakkersuisunut oqarsimaneragaanera” eqqortuunngilaq, ministereqarfik allappoq.

AAMMA ATUARUK Kinap Savalimmiut Huawei-imut isumaqatigiissuteqarnissamut siorasaaraa

Danskit nunanut allanut tunngasunut ministeriat, Jeppe Kofod oqarpoq:

- Oqarasuaatinut attaveqaateqarnerit savalimmiormiut namminneq akisussaaffigisarigaat oqaatigissallugu pingaaruteqarpoq. Taamaammat 5G-mik pisiortorfissamik toqqaanissaq savalimmiormiut namminneq aalajangigassaraat.

Aamma ministeriunerup, Mette Frederiksenip Savalimmiut nunaminni 5G-mut attaveqaatinik pisiortorfissamik namminneq aalajangiisussaasut marlunngornermi erseqqissaatigaa.

Kinamiut Danmarkimi aallartitaata Savalimmiunilu naalakkersuisuni qaffasissumik atorfillit akornanni ataatsimiinnermit nipi immiussaq savalimmiormiut TV-qarfiata, Kringvarpip tigummisaa pillugu suliaq Kinap Danmarkimi aallartitaa suli oqaaseqarfiginngilaa.

Immiussaq saqqummersinneqartussannguliivissut immiussat saqqummersinneqarnissaannut Savalimmiuni eqqartuussisumit inerteqquteqartoqarpoq.

Venstrep nunanut allanut tunngasunut oqaaseqartartuata, Michael Aastrup Jensen aamma Dansk Folkepartiip nunanut allanut tunngasunut oqaaseqartartuata, Søren Espersenip suliaq taanna Folketingimi Nunanut allanut tunngasunut politikkikkut aalajangiisartoqatigiinni oqallisigerusuppaat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk