Politikki Nunanit allanit

Savalimmiuni qineqqusaarnermi aalisarneq isumaqatigiinngissutaanerpaavoq

Savalimmiuni aalisarnermi iluarsartuusseqqinnissaq marlunngorpat inatsisartunut qinersinissamut atasumik oqallinnermi sammineqaqaaq. Nunap isertitsissutiginerpaasaata iluaqutiginissaat qanoq qulakkeerneqarnissanersut politikerit suli aalajangiiffiginngilaat. Akerlianik Danmarkimit avissaarnissaq siusinnerusumiit eqqartornikinnerulersimasoq, Savalimmiuni tusagassiortoq KNR-imut oqaluttuarpoq.

Allattoq Helle Nørrelund Sørensen

aggustip 28-at 2015 15:12

Nutserisoq Erna Lynge

Savalimmiormiut apeqqusigassaanngitsumik inuussutissarsiutaanni pingaarnerpaaq - aalisarneq - qineqqusaarnermi isumaqatigiinngissutaanerpaavoq.

Savalimmiut radioanni tv-qarfiannilu Kringvarpimi tusagassiortoq Beinta Løwe taama oqaluttuarpoq.

- Inatsisartut isumaqatigiissutigisimavaat 2018 tikitsinnagu aalisarneq pillugu aaqqissuusseqqittoqassasoq. Taamanikkussamummi aalisarsinnaanermut akuersissutit tamarmik atorunnaareersimasussaapput. Pisariaqarluinnarpoq partiit aappaaguutinnagu aaqqissuusseqqinnissamik isumaqatigiissuteqarnissaat. Qanormi pisoqassanersoq maannakkut ilisimaneqanngilaq.

Aamma atuaruk Savalimmiuni qineqqusaarnermi makku oqallisigineqarput

Maannamut aaqissuusseqqittoqarsimannginnerata kinguneraa, aalisartut nutaanik atortussarsiniarnissaminnut kinguarsimaarnerat. Aammali nalornissutigineqarpoq nunani allamiut savalimmiuni aalisarnissamut akiliillutik peqataalersinnaajumaarnersut.

Soraarnerussutisialli pillugit aaqqissuusseqqittoqarnissaa aamma oqallisaavoq; aammalu suiaaqatigiit katissinnaalernissaat sammineqarluni.

- Arnat arnaqatiminnik angutillu anguteqatiminnik aappaqartartut piginnaatitaaffii Savalimmiuni ukiuni kingullerni eqqartorneqarsimaqaat. Taamaattumik qineqqusaarnermi uani sammineqarluarput, Savalimmiunilu tamakku katissinnaalernissaat arlalinnit piumasarineqarluni.

Aamma atuaruk Savalimmiuni kikkut Naalakkersuisunngussanersut nalunarpoq

Akerlianit Danmarkimut attaveqarneq sammineqarpallaanngilaq, naak danskit tusagassiuutaasa arlaqartut taamaanneraraluaraat, Beinta Løwe oqaluttuarpoq.

- Siornatigumut naleqqiullugu taanna sammineqarpallaanngilaq. Republikanerit - tassa avissaarniat - piumasaqarsimapput nammineq tunngaviusumik inatsiseqalissasugut, tamannalu aappaagu innuttaasunit taasissutigitinneqassasoq. Tamannali sammineqarpallaarsimanngittoq, Beinta Løwe naggasiivoq.

Isumasiuinerup kingulliup takutippaa maannakkut naalakkersuisooqatigiit liberaliusut illuatungiliuttullu naligiittupilussuusut. Isumasiuinerulli aamma takutippaa qinersisartut 18 procentii kikkut qinissallugit suli aalajangersimanngitsut.

Aamma atuaruk VIDEO Savalimmiormiut septembarip aallaqqaataani qinersissapput