Savalimmiuni kikkut Naalakkersuisunngussanersut nalunarpoq

Lagmandi, Kaj Leo Holm Johansen ilungersunartorsiorpoq. Naalakkersuisuutitaali maanna suli amerlanerussuteqarput, taamaammat allanik naalakkersuisunngortoqassappat qinersisartut isumaat allanngortariaqaqqaassapput. Savalimmiuni nutaarsiassaqartitsivimmi Kringvarpimi pisortaq, Liljan Weihe taama naliliivoq.
Assi © : Kringvarp
Allattoq Walter Turnowsky
aggustip 04-at 2015 05:02

Lagmandip Savalimmiuni inuiattut ullorsiornermi, Olaip ulluani, qinersinissaq nalunaarutigimmagu sivisulaamik ilungersunartorsiornerata tamanna kinguneraa. Ukiunimi marlunni sullorsualiornissaq pillugu suliaq misissuiffigineqareerpoq. Lagmandip paasissutissanik eqqunngitsunik Lagtingimut tunniussisimasoq, Misissuinermi aqutsisup paasivaa. Eqqunngitsunik paasissutissiiginnanngilaq, arlaleriarlunili Naalakkersuisut akisussaaffeqarneranut inatsit unioqqutissimavaa

- Suliap taassuma qinersinerup inerneranut sunniissasoq qularnanngilaq, qanorli Kaj Leo Holm Johannesenimut sunniuteqartigissanersoq suli nalunarpoq, Liljan Weihe, nutaarsiassaqartitsivimmi Kringvarpimi pisortaq nassuiaavoq.

Aamma atuaruk VIDEO Savalimmiormiut septembarip aallaqqaataani qinersissapput

Ersersarpaalu lagmandip partiia, Sambandspartiet juunimi folketingemut qinersisoqarnerani folketingimiittuutitaat qinigaaqqinngitsoornikuusoq. Siullerpaamillu Savalimmiunit partiinit saamerlernit marluk Folketingemut qinigaapput.

- Republikanerit Socialdemokratillu lagtingimut qinersisoqarnerani aamma siuariassasut ilimagaara, Liljan Weihe oqarpoq.

Maannamulli naalakkersuisoqatigiit partiinit talerperlerneersut amerlanerussuteqarput, tassa inatsisartuni ilaasortani 33-usuni 21-it talerperlerneermata. Allatut oqaatigalugu, naalakkersuisuutitaqartut ikinnerussuteqalissappata illuatungiliuttut inatsisartuniitsitaat tallimanik amerlissapput. Partiit saamerliit marluk qinerneqarnerpaassagaluarpataluunniit, aamma talerperliit Naalakkersuisunngoqqeriaannaapput.

Aamma atuaruk Naalagaaffeqatigiinni naalakkersuisut siulittaasuisa naapinnissaat unitsiinnarneqarpoq

- Partiit ataasiakkaat immikkut anguniagaqarlutik qineqqusaartarput, qinersinerullu kingorna isumaqatigiissusiornerit kikkut Naalakkersuisooqatigiinngussanersut aalajangissavaat, Liljan Weihe oqarpoq.

Nutaarsiassaqartitsivimmi pisortap nassuiaanermini oqaatigaa Savalimmiuni saamerliuneq talerperliunerluunniit kisimi assigiinngissutaanngitsoq, namminiilivinnissaq Danmarkimulluunniit atanissaq saamerliit talerperliillu iluinni aamma assigiinngitsunik isummerfigineqartarmat.

Aamma atuaruk Kielsenip ataatsimiinnissap unitsinneqarnera uggoraa