VIDEO Savalimmiormiut septembarip aallaqqaataani qinersissapput
Savalimmiormiut Septembarip aallaqqaataani qinersisussanngorput. Savalimmmiuni Olaip nalliuttorsiutigineqarneranut, tassa Savalimmiormiut inuiattut ullorsiornerat, atatillugu lagtingip ammarneqarnerni Lagmand Kaj Leo Holm Johannesen Savalimmiuni qinersisoqarnissaa suaarutigaa, taama Savalimmiuni nutaarsiassaqartitsiviit amerlanerit allaaserinnipput.
Pisut assigiinngitsut Savalimmiuni qineqqusaarnermik ajortunngortitsisinnaasut pillugit lagmnadi qaammatinik pingasunik sioqqutsilluni qinersinissamik suaarutiginnippoq.
Savalimmiuni lagtingip ataatsimiinnerata ammarneqarnerani, ullumi pingasunngornermi, lagmandip Kaj Leo Holm Johannesenip septembarip aallaqqaataani qinersisoqassasoq suaarutigaa.
Savalimmiuni naalakkersuisut siulittaasuat piffissami sivitsulersumi politikkikkut tatineqarpoq, tassami Savalimmiut inatsisartuini, Lagtingimi eqqunngitsunik oqalussimasoq paasineqarmat.
Immap naqqatigut sullorsualiorniarnermi suliniummit eqqissiviilliorneq aallartippoq. Suliarlu Folketingemi ombudsmandiusimasumit Hans Gammeltoft-Hansenimit misissorneqarpoq, taassumalu misissuinerata inerneraa lagmandip eqqunngitsumik oqalussimanerarneqarnera.
Gammeltoft-Hansenilli ilanngullugu oqaatigaa, suliaq rigsrettimut ingerlaqqittariaqanngitsoq. Misissuinerulli inernera lagmandimik nangaanartitsilersimavoq.
- Ilimagereersimavarput lagmandip qinersinissamik Olaip ulluani soraarutiginnissasoq, Savalimmiunit Folketingemut ilaasortanngoqqammersoq Magni Arge Ritzauimut oqarpoq.
Lagtingimut qinersinissaq oktobarip 29-at nallertinnagu soraarutigineqartussaareerpoq. Lagmandip ammaanermi oqalugiarnermini Savalimmiuni pissutsit eqqartorpai, naalakkersuisoqatigiillu ukiuni kingullerni sisamani angusimasaat aamma eqqaallugit.
Oqalugiaatinilu naggaserlugu Kaj Leo Holm Johannesenip nassuiaasinngikkaluarlugu qinersinissaq suaarutigaa.
- Tamanut pitsaaneruvoq silaannaap salinnissaa innuttaasullu oqallitsinnissaat, Magni Arge, Folketingemi Høgni Hoydalimut taartaasoq oqarpoq.
Magni Arge Savalimmiuni lagtingimut qinersinissamut qineqqusaarniarpoq. Qinigaassappallu Folketingemi ilaasortat allanngorsinnaassapput.
