Politikki

Naalagaaffeqatigiinni naalakkersuisut siulittaasuisa naapinnissaat unitsiinnarneqarpoq

Naalagaaffeqatigiit Danmarkip, Savalimmiut Kalaallit Nunaatalu siuttui aggustip naanerani ukiumoortumik ataatsimeeqatigiinnissaannissaannik pilersaarutaasoq unitsiinnarneqarallarpoq.

Allattoq Ivik Kristiansen, Nauja Møller

aggustip 03-at 2015 10:11

Ataatsimeeqatigiinnissaq rubinisiorfimmi Aappaluttumi ingerlanneqartussatut pilersaarutaagaluartoq unitsiinnarneqarpoq, Naalakkersuisut siulittaasoqarfiannit taama nalunaarutigineqarpoq.

Aamma atuaruk Naalagaaffeqatigiinni naalakkersuisut siulittaasui Nuummi naapissapput

- Lagmandi Savalimmiuni qinersisoqarnissaa pissutigalugu peqataasinnaanngitsoq nalunaarput, Naalakkersuisut siulittaasoqarfianni pisortaq, Søren Hald Møller taama oqarpoq.

- Savalimmiunilu qinersisoqareerpat aalajangiunneqassaaq ataatsimiinneq ingerlanneqassanersoq. Taamaattumik ataatsimiittoqassanersoq unitsiinnarneqassanersorluunniit qulakkeersinnaanngikkallarparput, taanna oqarpoq.

Naalakkersuisut siulittaasuata Kim Kielsenip rubinisiorfimmi Aappaluttumi ataatsimeeqatigeereernerup kingorna ornitassaraluaminnut tassa Qeqertarsuatsiaanut, sapaatip akunnera kingulleq tikeraarpoq.

Maannalu ataatsimeeqatigiinnissaq unitsikkallarneqarpoq.