Savalimmiuni ilisimatuut coronavirusip sananeqaatai misissuleraat

Savalimmiut inukinnerat ilarpassuisalu misissugassamik tigusiffigineqarsimanerat, Savalimmiuni ilisimatuut coronavirusimik misissuilersaartut iluaqutigisinnaavaat.

Allattoq Anton Gundersen Lihn

apriilip 01-at 2020 05:48

Nutserisoq Hanne Petersen

Savalimmiuni ilisimatuut coronavirusip sananeqaataanik qanorlu tunillaassuuttarneranik misissuilersaarput. Savalimmiuni nutaarsiassaqartitsivik Kringvarp Føroya taama allappoq.

Torshavnimi ilisimatuutut misissuiffik, INOVA, misissuisuussaaq. Savalimmiut inukinnerat ilarpassuisalu misissugassamik tigusiffigineqarsimanerat coronavirusimik misissuinermi tunngavigineqarluarsinnaasut, pisortaq Janus Vang isumaqarpoq.

- Ilisimasaqarluarfigaarput, misissuinermut atortuvut nutaaliaanerpaapput coronavirusillu qanorpiaq tunillaassuuttarneranik misissuinissatsinnut najoqqutarilluarsinnaasatsinik misissugassanik tigooraanerpassuatsinnit paasissutissaateqarluarluta, Janus Vang oqarpoq.

Aningaasaliisussaaleqisut

Janus Vangip oqarnera naapertorlugu coronavirusip sananeqaatai, nualluut taanna qanorpiaq tunillaassuuttarnersoq qanorlu siaruaattarnersoq misissoqqissaarneqassapput.

- Assigiinngitsunillu viruseqarneranik tunillaassoriaaseqarneranillu misissuinissatsinnut aamma periarfissaqarpugut, Janus Vang Kringvarp Føroyamut oqarpoq.

Ilisimatuulli misissuivilertigatik aningaasaliisussarsioqqaatariaqarput.

Aningaasaateqarfiup Novo Nordisk Fondenip 50 millionit koruunit coronavirusimut akiuiniarnermut suliniutinut immikkoortitai periarfissaasinnaapput. Savalimmiuni, nunatsinni Danmarkimilu tamatuminnga suliallit aningaasanit taakkunanit aningaasaliiffigineqarnissaminnut qinnuteqarsinnaapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.