Savalimmiormiut Danmarkimut sooq nuuttarnersut misissorneqarpoq

Savalimmiuni innuttaasut pingajorarterutingajaat Danmarkimi najugaqarput.

Savalimmiormiut ilinniagaqarluarsimasut, pingaartumillu arnat, Danmarkimi najugaqarnerusartut ilutigitillugu aamma takuneqarsinnaavoq.

Savalimmiormiut qasserpiaat Danmarkimi najugaqarnersut pillugit aatsaat taama sukumiitigisumik misissuisoqarpoq. Katillugit 21.687-t Danmarkip kujasissortaani agguataarlutik najugaqarput, taakkulugooq kinguaariit pingasuukkajunnerupput – tassalu Savalimmiuni innuttaasut pingajorarterutingajaat Danmarkimi najugaqarput.

Misissuineq Folketingimi Atlantikup avannaani suleqatigiit aallartitaraat. Paasissutissallu Danmarkimi Naatsorsueqqissaartarfimmit pissarsiaapput.

Savalimmiormiut Danmarkimi najugallit amerlanersaat 25-iniit 39-it tikillugit ukioqartuupput.

- Tamanna iluatsitsineruvallaanngitsutut isigineqarsinnaavoq, taamatummi ukiullit tassaapput suliffissarsiuussisarfimmit atorfissaqartinneqarnerusartut, misissuisitsinermi naliliipput.

Savalimmiuni innuttaasut 48.000-ngajaapput, misissuinermilu paasineqarpoq, savalimmiormiut agguaqatigiisillugu 240-t Danmarkimut ukiumut nuuttartut.

Misissuineq Atlantikup avannaani suleqatigiit annertusiniarpaat, savalimmiormiut Danmarkimi najugallit sooq uteqqittannginnersut paasiniarneqassaaq, nuuttarnerannullu peqqutaasut aamma paasiniarneqassallutik.