Qaammataasaq aallartinneqartoq atorlugu umiarsuit nakkutigilluarneqalissapput
Europamiut avataarsualiartitsisarfiata ESA-p pingasoriarluni kinguartitsereerluni iluatsittumik Soyuz-raketti Fransk Guyanamiit aallartippaa, Aalborg Universitetip qaammataasiaa kingulleq - AAUSAT4 tassani ilaavoq. Taassuma siulerai AAUSAT3 aamma AAUSAT5 avataarsualiartartoq Andreas Mogensen peqatigalugu sananeqarsimasut.
Raketti qaammataasamik usisoq unnuaq aallartinneqarmat, ingerlalluartoq Aalborgimi ingeniørinngorniat ullaaq sisamanut paasivaat Pituffiup eqqaani atortorissaarut aqqutigalugu.
- Aallartitatta siulianut attaveqarniarnerput ajornakusoorsimammat assut annakkuummivugut aallartitatsinnut attaveqarsinnaagatta, ingeniørinngorniaq Mikael Juul Kristensen oqarpoq.
AAU-mi lektori Jens Dalsgaard Nielsen naapertorlugu aallartitaq ingerlalluarpoq:
- Qaammataasaq pitsassuuvoq. Tullinnguuppoq umiarsuarnit Kalaallit Nunaata sineriaani angalasunit paasissutissanik pissarsiniartarnitta pitsanngorsarnissaa, taannaavormi AAUSAT4-p suliassaa pingaarnerpaaq lektori AAU Student Spacemeersoq nuannaaqisoq annakkuummersimaqisorlu oqarpoq.
