Sarfaq Ittup aappaagu angalanissaminut pilersaarutini ilavaa

Arctic Umiaq Line ukiup tullianinngaanniit avannarpasinnerusumut kujasinnerusumullu angallassisalissaaq.

Allattoq Mathilde Justesen Ranners

juulip 21-at 2023 12:23

Nutserisoq Sussi Jensen

2024-mi Arctic Umiaq Linep angalanissamut pilersaarusiaani sivitsorpaa tikitassallu amerlineqassammata nunatta kitaata sineriaani angalaneq ajornannginnerulerlunilu atoruminarnerulissaaq.

Ineqarnermut Attaveqaasersuutinullu Naalakkersuisoqarfik tusagassiorfinnut nalunaarummi taama allappoq.

Angalanissamut pilersaarusiami nutaami tikiffissat uku ilanngunneqarput: Uummannaq, Qasigiannguit, Kangaatsiaq, Itilleq/Igaliku, Narsarsuaq aamma Nanortalik. Umiarsuaq Nanortalimmiit Uummannap tungaanut angalasassaaq tikitassallu katillugit 18-it aqqusaartassavai.

Kissaatigineqangaatsiarsimasoq

Angalanissamut pilersaarut nutaaq misiliutaasussatut januaarip qaammataani saqqummiunneqarpoq, 2023-mi septembarip 15-ianiit novembarip 17-ianut misiliutitut atuuttussaagaluarluni.

Aamma atuarukArctic Umiaq Linemut kisimiilluni ilaaneq akisunerulissasoq

Ineqarnermut Attaveqaasersuutinuullu Naalakkersuisup Siumumeersup, Erik Jensenip, kitaata sineriaani angalanermut pilersaarutip ilaneqarnissaa sivisuumik kissaatigisarsimavaa.

- Arctic Umiaq Linep innuttaasutta ilarpassuinik inoqarfinni mikinerusuni najugaqartunik tassungalu tunngatillugu nunami innuttaasut takornariallu nunatsinni kusanartumik sumiiffinnik arlalinnik takusaqarnissamut misigisaqarnissamullu periarfissillugit sullissinnaalerpai, tusagassiorfinnut nalunaarummi taama allappoq.

Aqqut piffissamik sivisunerusumik angallaviussaaq

Ilaasut tikitassani toqqakkani illoqarfiliarnissaminnut najukkanilu neriniartarfinni nerinissaminnut, takornariarnissaminnut unnuinissamulluunniit periarfissaqalissasut allassimavoq.

Sarfaq Ittuk 2024-mi ukunani tulattassaaq

- Nanortalik

- Qaqortoq

- Narsaq

- Arsuk

- Paamiut

-Qeqertarsuatsiaat

- Nuuk

- Maniitsoq

- Kangaamiut

- Itilleq

- Sisimiut

- Attu

- Kangaatsiaq

- Aasiaat

- Qeqertarsuaq

- Ilulissat

- Qasigiannguit

- Uummannaq

Najoqqutaq: Ineqarnermut Attaveqaasersuutinuullu Naalakkersuisoqarfik

Allisiguk

Angalanissanik pilersaarut annertusisaq isorartuneruvoq taamaasilluni umiarsuaq tulakulanerusalissaaq.

Sarfaq Ittuk sapaatit akunnerata ingerlaneranni avannarpasinnerpaamiit kujasinnerpaamut taavalu avannarpasinnerpaamut uterlugu tikitassani tikittarpai.

Aamma atuarukSarfaq Ittuup illoqarfiit amerlanerusut ukiaru tikittalissagai

Siunissami Sarfaq Ittup sapaatit akunneri marluk atorlugit Uummannamiit Nanortalimmut kiisalu Uummannamut uterlugu aqqut angallavigisassagaa pilersaarutaavoq.

Tusagassiorfinnut nalunaarummi aamma allassimavoq Uummannap Upernavillu akornanni 2024-mi angallassinissamut pilersaarummik immikkut aamma Arctic Umiaq Line suliaqartoq.

Nutaarsiassami kukkunermik nassaarsimaguit uunga allaffigineqarsinnaavugut.