Sarfaq Ittuup illoqarfiit amerlanerusut ukiaru tikittalissagai

Sinersortaat Sarfaq Ittuk avannaani Ilulissaniit kujataani Qaqortumuinnaq ukiorpassuarni angalasarpoq. Ukiaruli Upernavimmiit Nanortalimmut angalasalissaaq, tallimanillu maannarni amerlanerusunik aqqutaani aqqusaarfeqartassalluni.
Sarfaq Ittuullu tikittagaasa ukiarumiit amerlinissaat Ineqarnermut Attaveqaasersuuteqarnermullu Naalakkersuisup Erik Jensenip nuannaarutigai. Assi © : Arctic Umiaq Line
Allattoq Else Olsvig, Mads Malik Fuglsang Holm
januaarip 13-at 2023 17:24

Sarfaq Ittuk septembarip 15-aniit novembarip 17-anut illoqarfiit nunaqarfiillu maannakkornit amerlaneroqisut misiliutaasumik tikittalissavai.

Sarfaq Ittuup tikittagai arfineq marlunnik ilasussanngorput, tassa sinersortaatip maannamut tikittakkami saniatigut ukiaru septembarip 15-anniit tikittalissavai Upernavik, Uummannaq, Qasigiannguit, Kangaatsiaq, Itilleq, Igaliku, Narsarsuaq aamma Nanortalik.

Ineqarnermut Attaveqaasersuutinullu Naalakkersuisoqarfik tusagassiutinut allalluni taama paasissutissiivoq.

AAMMA ATUARUK Arctic Umiaq Linemut kisimiilluni ilaaneq akisunerulissasoq

Sarfaq Ittuullu tikittagaasa ukiarumiit amerlinissaat Ineqarnermut Attaveqaasersuuteqarnermullu Naalakkersuisup Erik Jensenip nuannaarutigai.

- Tamanna politikikkut kissaat annertuumik eqqartortarsimavarput, aammalu innuttaasut kissaat taanna apuuttarsimavaat, ilaatigut atsiornernik katersinermikkut angallanikkut pitsanngorsaanissamik kissaateqarnertik apuuttuartarsimallugu. Tamannalu qujanartumik suleqatigiilluarnikkut anguneqarluni, taamaattumillu naalakkersuisuniit nuannaarutigisorujussuuarput.

Sarfaq Ittuup sinerissami tikittagassaasai amerlanerisigut nunatsinni angallassinerup ataqatigiinnerulernissaa, taamaalillunilu innuttaasut takornariallu tikitassaqarnerulernissaat neriuutaasoq Erik Jensen aamma oqarpoq.

Kalaallinut takornarianullu iluaqutaassasoq

Angalanissamut nutaaamik pilersaarusiornikkut Erik Jensenip neriuutigaa, Kitaani Kujataanilu attaveqarneq aalaakkaanerulerlunilu ataqatigiinerulissasoq, kalaallit takorniariallu nunatsinni ajornannginnerusumik angalasinnaalersillugit. 

Taamaammat aamma sinersortaatip siunissami tikittagaasa amerlanerulernerisa tigulluarneqarnissaa neriuutigaa, siunissami sinersortaatitigut angalassinerup isikkussaanut tamanna sunniuteqartussaassammat:

- Innuttaasunut takornarissanut allanullu aamma pitsanngorsaanerit ingerlannerat taamalillugu piviusunngorpoq, oqallinnerillu angeqqittussaallutik. Aammalu umiarsuaq nutaamik peqalissanersoq ukiuni tulliuttuni aamma tamatuma timitalerneqarsuinnaanissaanut aamma nalilersuinerit ingerlanneqartussaassallutik, Erik Jensen oqarpoq.

Sarfap Ittuk Upernavimmiit Nanortalik tikillugu sinersortilluni aqqusaarfigisamini sivisunerusumik aamma taleqqasalissaaq, taamaalilluni ilaasut aqqusaakkaminni niuernermut iluaqutaasumik sivisunerulaartumik niusimaartarniassamata.

AUL.gl-mi angalanissamut pilersaarutit akillu misissorneqarsinnaapput.

Aamma atuaruk