Arctic Umiaq Linemut kisimiilluni ilaaneq akisunerulissasoq

Angalaqatigiinnulli pingasunit sisamanut amerlassuseqartunut akikinnerulissaaq. Aningaasat naleerukkiartorneranut atatillugu akinik allannguisoqartoq, pisortaq, Jens-Jakob Sandgreen oqarpoq.
Ineeqqat parnaartartut 83 procentii inunnit ataatsimit marlunnilluunniit atorneqartarput, naak taakku inunnut pingasunit sisamanut inissaqaraluartut. Assi © : Arctic Umiaq Line
Allattoq Emilie Søndergaard Christiansen
decembarip 05-at 2022 14:03

Inummut ataatsimut Sarfaq Ittummut ilaaneq 2023-mi akisunerulissaaq. Tamanna aningaasat naleerukkiartornerani naleqqussaanerup ilagigaa, pisortaq, Jens-Jakob Sandgreen oqarpoq.

- Arctic umiaq line, ukua akigut 2014-imili inflation aallaavigalugu malinnaatinnikuunnginnatsigit. Taava inflation malillugu akigut nutarsassagaluarutsigit toqqaannartumik allannguinata akit tamarmik 14 procentimik qaffassagaluarput.

- Taanna uulia aappaagumut akia 47 procentimik uagutsinnut qaffappoq. Taava ukua angalasartut billitsii akii allanngortinnagit assinginik qaffassasuugutsigit, taava angalasut tamaavimmik minnerpaamik 200 koruunimik qaavatigut akiliisalissapput.

Ineeqqanik atorluaaneq

Taamaammat Sarfaq Ittummi ini ataaseq, inummit ataatsimit marlunnilluunniit unnuiffissaq 7,1 procentimik akisunerulissaaq.  Akitsuineq umiarsuarmi ineeqqanik tamakkiisumik atorluaaniarnermik peqquteqartoq Jens Jakob Sandgreen oqarpoq.

AAMMA ATUARUK Tunillaassuuttoqalersinnaammat Sarfaq Ittuk ilaaffigineqarsinnaanngikkallarpoq

- Akit aaqqissorneri ineeraatitsinnik atorluaanerunissamik tunngaveqarpoq. 26-nik parnaartartunik sisamanik siniffissartaqartunik ineeraateqarpugut. Ineeqqat parnaartartut 83 procentii inunnit ataatsimit marlunnilluunniit atorneqartarput, naak taakku inunnut pingasunit sisamanut inissaqaraluartut. Siniffiit atorneqanngitsut inummit ataatsimit marlunnilluunniit inniminnerneqaraangata ulikkaapallattarpugut, Jens-Jakob Sandgreen nassuiaavoq.

Angalasut amerlanerusut

Naak inummut ataatsimut akit qaffakkaluartut ineeqqat parnaartartut inunnut pingasunit sisamanut akikinnerulissapput. Taamaalilluni ineeqqat parnaartartut soqutigineqarnerulerlutillu pitsaanerpaamik atorluarneqassapput.

- Inissamik atorluaagutta taava angalasut aamma amerlanerussapput, inissaqartitsinerlu annertunerulissalluni. Siniffiimmi atorneqanngitsut amerlagaluartut inissaqartitsisoqarunnaartarput. Ineeqqanik parnaartartunik atorluaanerulernissaq qitiuvoq.

Akinik allannguineq 2023-mi atuutilernissaa naatsorsuutigineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk