Tunillaassuuttoqalersinnaammat Sarfaq Ittuk ilaaffigineqarsinnaanngikkallarpoq

Sarfaq Ittummi inuttat marluk coronavirusimik tunillanneqarsimasut paasineqarpoq, inuttat sinnerisa akornanni coronap ersiutaasa assinginik napparasimalersimasut amerliartorput. Taamaammat Nuup tungaanut angalanermi ilaasoqassanngilaq.
Sinersortaat Qaqortumut ullumi tallimanngornermi ualikkut nalunaaqutaq sisamanut aqqusaarluni tikippat Nuup tungaanut ilaasussanik ikisoqarsinnaanngitsoq Arctic Umiaq Linep nalunaarutigaa. Assi © : Mads Pihl/Visit Greenland
Allattoq Mads Lynge
januaarip 07-at 2022 15:16

Sinersortaat Sarfaq Ittuk Nuup tungaanut angalanermi piffissami ingerlaarfiusumi matumani kingullermi ilaasoqarasinnaanngikkallarpoq.

Arctic Umiaq Line tusagassiutinut taama nalunaaruteqarpoq.

Sarfaq Ittummi inuttat marluk quick testit atorlugit misissorneqarmata coronavirusimik tunillanneqarsimasut paasineqarpoq. Naallu inuttat sinnerisa akornanni coronavirusimik tunillanneqarsimasumik paasisaqartoqanngikkaluartoq, coronap ersiutaasa assinginik napparasimalersimasut amerliartorput.

Ilaasussat Sarfaq Ittummut billitsillit Arctic Umiaq Line-mut saaffiginnissapput billitsit utertinnissaat pillugit, uunga : info@aul.gl

 

Ilaasussat angalanissamut eqqorneqartut pineqartuni najugaqanngitsut upalungaassimanermut piareersimasussanut, saaffiginnissapput ukunani: Kommune Kujalleq oqarasuaat 64 53 12, Sermersooq Kommune oqarasuaat 54 54 56.

Sarfaq Ittuk tamanna pillugu Nuup tungaanut angalanermi ilaasoqaqqissiinnaanngilaq.

AAMMA ATUARUK Nakorsaaneq: - Nunatta annersaani ulluni aggersuni tuniluuttoqassaaq

Sinersortaat Qaqortumut ullumi tallimanngornermi ualikkut nalunaaqutaq sisamanut aqqusaarluni tikippat Nuup tungaanut ilaasussanik ikisoqarsinnaanngitsoq Arctic Umiaq Linep nalunaarutigaa. Sarfaq Ittuk Nuummut sapaatiuppat tikereerpat, Danmarkimut aserfallatsaaliorneqarnissamut piareersarneqassasoq pilersaarutaagaluarpoq.

- Taama inissisimasoqalernera ajuusaarnartupilussuuvoq, inuttalli akornanni maannakkorpiaq pisut pissutigalugit ilaasunik allanik umiarsuarmut ikisoqarnissaa illersorneqarsinnaanngitsutut nalilerparput, umiarsuaatileqatigiiffiup pisortaanera Aviâja Lyberth Lennert oqarpoq.

Ilaasut Arsummut angalasut qanoq iliorluni isumannaatsumik apuunneqarsinnaanersut misissorneqassaaq, Arsummut Arsummiillu ilaasunik angallassinissamut allanik periarfissaqanngimmat.