Nakorsaaneq: - Nunatta annersaani ulluni aggersuni tuniluuttoqassaaq

Coronamik tunillanneqarsimasut nutaat 198-t ippassamiit paasineqarput, taakkunannga 171-t Nuummeersuupput.

Taakkunannga 18-t Ilulissaneersuupput, ataaseq Aasianniit, arfinillillu Maniitsumiit marlullu Qaqortumeersuullutik.

Taamaalilluni nuna tamakkerlugu tunillanneqarsimasut katillugit 719-upput, aatsaallu taamak amerlatigisaqattaalerlutik.

- Tuniluunnersuaqarpoq - ingammik Nuummi, nakorsaaneq Henrik L. Hansen Naalakkersuisut siulittaasuannik Múte B. Egedemik (IA) aammalu Peqqissutsimut naalakkersuisumik Kirsten Fenckerimik (Naleraq) peqateqarluni tusagassiortunik katersortitsinermi oqarpoq.

Qanermut assiaqutip atoqqusaanera

Coronapasimik takutitsisarnissaq

Inuit tamat isersimaffigisinnaasaanni isersimaqqusaasut appasinnerpaaffilerneri, ima paasillugu, qatserisartut isersimasinnaasunut amerlassusiliinerisa affaanaat taamaallaat isersimaqqusaalissapput.

Maanna illoqarfiit arlallit killilersuutinik atuiffiusut tassaapput: Nuuk, Qasigiannguit aammalu Upernavik taakkunanilu nunaqarfiit aammalu Kangerlussuaq.

- Inuit tallimat misissortikkaangata ataaseq tunillanneqarsimasarpoq, maannalu tuniluunneq ingerlarsoqaaq. Ukiaq sumiiffiit tuniluuffiusut imatorsuujunnaarput, maannali tuniluuffiusuni sivikitsuinnarmik qanillilaarsimasulluunniit tamarmik tunillanneqarsimasarput, aasaq killiffitsinnut sanilliullugu maanna pissutsit allaalluinnarput, nakorsaaneq oqarpoq.

Unnuap qeqqaniit killilersuutit nutaat atuutilissapput

Tuniluunnerup sakkortuserujussuarnera omikronimik patsiseqarpoq ingammik Nuummi. Misiliutit Danmarkimut nassiunneqareerput, inernerili Statens Institutimi suli iluamik qulakkiinngikkaluarput, nakorsaanerli qulanngilluinnarpoq.

- Tuniluunneq avataaniit tikittunit aallaaveqarpoq siusinnerusukkullu tuniluunnerup ingerlaaranut sanilliullugu sukkaneroqaaq. Piffissamilu aggersumi inuppassuit tunillanneqassapput, misikkaluassavarpulli ataatsikkorsuaq tuniluuttoqannginnissaa anguniarlugu iliuuseqarniarsaraluta, taanna oqarpoq.

Taamaattumillu jannuaarip tallimaat aallarnerfigalugu killilersuutit nutaat atuutilerput: Unnuap qeqqaniit atuutilersumik nuna tamakkinngikkaluarlugu illoqarfinnili nunaqarfinnilu pinngitsoorani coronapasseqaqqusisoqassaaq ullut 14-t matuma siornaniit sumiiffinni tuniluunnerup aallaavianik ilisimanninngiffiusuni. Soorlu maannannakkorpiaq Nuummi, Qasigiannguani Upernavimmi taakkualu nunaqarfinni pigisaani aammalu Kangerlussuarmi maanna taamaappoq. Taamaalillutik sumiiffiit taakku marluk killilersuiffigineqalerput.

Tassalu imaappoq, inuit tamat iserfigisinnaasaanni coronapasimik takutitsinissap avataatigut qanermullu assiaqummik atornissap avataatigut, imerniartarfinniissinnaasut neriniartarfinniissinnaasullu qatserisartut amerlassusereqqusaasa affaannaat kisimik isersimaqqusaalissapput.

Smserneq nammineerlunilu misissornerit

Iliuusissallu allat nutaat aamma takkutilerput, taama Múte B. Egede ullumi tusagassiortunik katersortitsinermi oqarpoq: Tassalu pcr-testimik misissortissimagaanni tunillanneqarsimasunut sms-iinnartoqartalissaaq. Siusinnerusukkut tunillanneqarsimasut sianerfigineqartarsimagaluarput maannali smsikkut nalunaarfigineqartalissallutik.

- Taamaaliorutta uagutsinnut sukkanerussammat, Múte B. Egede oqarpoq

Taanna naapertorlugu smsikkut nalunaaruteqaraanni sukkanerusumik aamma imminut mattunnerit pisinnaapput, aammalu tuniluunnermut sakkukillisaataasinnaasoraa.

Tunillanneqarsimasuttaaq namminneq akisussaaffigissavaat qanillisimasaminnut attaveqarnissartik, aammalu ingerlaannaq nalunaarfiginnittassapput, naalakkersuisut siulittaasua oqarpoq.

Illoqarfinni nunaqarfinnilu tamani nammineerluni misissuissummik misissorsinnaaneq aamma periarfissaassaaq, peqqissutsimut naalakkersuisoq Kirsten L.Fencker oqarpoq, tuniluunneq ingerlaannginniassammat aammalu maannakkutut misissortinniarlutik utaqqisorpassuit tunuleriiaartarnerat pinaveersaartinniarlugu. 

Múte B. Egedelli neriorsuutiginngilaa, qaqugorpiaq angerlarsimaffinni nammineq inuit misissortalerumaarnerat pisinnaalissanersoq, tassa sumi tamani pisiassaalernissaat.

- Aqaguusinnaanngilaq aqaguaguluunniit, erseqqissaavoq.

Taamatuttaaq innuttaasut tamarmik 18-niit 40-nik ukiullit pingajussaanik kapitissinnaanissaat sapaatip akunnerini aggersuni periarfissaassasoq erseqqissaatigineqarpoq.

Aammattaaq meeqqat tallimaniit aqqanilinnik ukiullit jannuaarip ingerlanerani siullermeerummik kapitinnissaannik neqeroorfigineqarumaarput, Kirsten Fencker oqarpoq.