Sara Olsvig inatsiseqarnermut ministerimut kissaaterpassuaqartoq

Danskit inatsiseqarnermut ministeriat, Søren Pape Poulsen juullimut kissaatissaaleqiguni, allaffianut maanna  ilisisoqarpoq.

Inatsiseqarnermut naalakkersuisup, Sara Olsvigip (IA) iliuusissanik qinersinissamut suliniutissanullu pilersaarut 36-nik qupperneqartoq Inatsiseqarnermut ministereqarfimmut nassiuteqqammerpaa, tassani nunatsinni inatsiseqarnermut eqqartuussiveqarnermullu suliniutit iluarsaannissaat nutaanillu suliniuteqarnissaq ilaatinneqarput.

Søren Pape Poulsenip nalunaarsuutit taakku nammineq piumasarai. Suliassaaleqiffiussanngitsorlu Olsvigip oqaatigaa.

AAMMA ATUARUK Eqqartuussiveqarfiit 40 mio. koruuninik aningaasaliiffigineqarput

Allattukkani Danmarkip nunatsinni suli akisussaaffigisaani inatsimmik nutarsaanissamik kissaateqarneq qullerpaatut allassimavoq.

Folketingi kunngikkormiut ullumikkut nunatsinnut peqqussuteqartarnerannik suliaqartarpoq, taakkulu folketingimi inatsisinit imaqqortunerusunit annikinnerusarput. Peqqussutilli inatsimmi siunertarineqartumut paasiuminarsaatinik oqaasertalerneqarneq-ajorput. Minnerunngitsumik inuit inatsisilerinermik ilinniarsimanngitsut paasisinnaassanagit.

Inatsisinilli nutarsaaneq Inatsiseqarnermut ministereqarfimmi allartereerpoq.

Tamanut assigiimmik akissarsiaqartitsineq

Suliniutissat sisamaattut, naalagaaffeqatigiinnermi Inatsiseqarnermut tunngasunik suliaqartut tamarmik akissarsiatigut atugassarititaasunik assigiinnissaat piumasaqaataavoq.

Kalaallit politiivini pineqaatissinneqarsimasunullu inissiisarfinni sulisut Danmarkimi suleqatiminnit akissarsianut tunngatillugu ullumikkut allamik isumaqatigiissuteqarfigineqarput. Kalaallit Politiivisa peqatigiiffiat naalagaaffimmut aasaq nutaamik isumaqatigiissuteqarpoq, tamatumanili danskit kalaallillu politiini atorfeqartuisa akissarsiaat suli assigiinngingaatsiarput.

Søren Pape Poulsenip ’suliaq misissuiffiginiarlugu’ upernaaq ataatsimiinnermi neriorsuutigaa, Sara Olsvigillu suliaq sumi inunngorsimaneq tunngavigalugu akissaasersuinerup atorunnaarsinneqarneranut assersuutigalugu assigiinngisitsineq ’akuersaarneqarsinnaannginnerarpaa’.

Kinguaassiutinut pinerlussimasut ukkatarinerat

Kinguaassiutinut pinerlussimasutut eqqartuunneqarsimasut katsorsartinnissamut neqerooruteqartalernissaq pingaarnerit ilaattut kissaatigineqarpoq. Tamanna meeqqanut naapertuilluanngitsuliortarnerit ikilisinniarnerata kissaatigineranit aallaaveqarpoq.

’Tamanna inatsisinik unioqqutitsisartut eqqortumik katsorsartalerneqarnissaata aamma pineqaatissinneqarnertik naammassigunikku meeqqanut eqqunngitsulioqqinnginnissaannut qulakkeerutissatut pitsaanerpaasoq, iliuusissatut pilersaarummi allassimavoq.

AAMMA ATUARUK Vi accepterer ikke ventetiden

Katsorsaanermut neqeroorut naapertuilluanngitsuliortartut akornanni pisariaqartitsinerup misissuiffigineqareerneratigut pissaaq.

Naalakkersuisuttaaq politiit kinguaassiutinut naapertuilluanngitsuliornermut nalunaaruteqartoqarneranit akunnerit 24-t qaangiutsinnagit suliaqartarnissaat kissaatigaat, tamanna kommunit nalunaarfigineqarnerminnit ullumikkut malitassarereerpaat.

Nunatsinni sumiiffinni tamani pinerluuteqarsimasunut inissiisarfiit, eqqartuussiviit politeeqarfiillu iluarsartuunneqarnissaat kissaatigisat qulit pingaarnerit akornanniipput, aamma illersuisut pinerluuteqarsimasunik suliaqartartut sulinerminni atugassarititaasa pitsanngorsarneqarnissaat piumasaqaataavoq.

Oqallisigineqarsimasut allat naqqaniinnerusut

Namminersorlutik Oqartussat inatsisaat naapertorlugu nunatta inatseqarnermut susassaqarfik Danmarkimit tigusinnaavaa. Tamannalu siunissamut pilersaarutaasoq, Sara Olsvig iliuusissatut pilersaarutip siulequtaani allappoq. Tamannali ’naleqqumi inissisimalerneratigut’ Danmarkimit ajornerunnginnerani aatsaat pisinnaasoq erseqqissaatigaa.

Danskit naalagaaffiata iliuuseqarfigisariaqagaani pingaarnersiuineq Naalakkersuisut Inatsiseqarnermullu ministereqarfiup suleqatigiinnerisa saqqummiunneratut aamma isigineqassaaq, pinngitsoornagulu piumasarineqartutut isigineqarnani.

Susassaqarfiit angisuut, Naalakkersuisunit Folketingimilu kalaallit politikeriisa siusinnerusukkut ullormut oqaluuserisassaniissimasut allattorsimaffimmi naqqaniinnerulerput.

AAMMA ATUARUK Eqqartuussiveqarneq IA-p pitsanngorsaavigerusukkaa

Matumani assersuutigalugu pinerluuteqarfiusunut siunnersuisarnermik pilersitsineq nr. 21-miilerpoq, pinerluffiusimasunut aningaasaateqarfik 25-mi. Kommunefogedinik amerlanerusunik piumasaqarneq, katersuiniarnermut ajornartorsiuteqarneq pillugu oqallisigineqangaatsiarsimasoq aamma appasinnerusumiilluni normu 38-mi eqqaaneqarpoq.

Inatsisinik unioqqutitsisartunik pinaveersaartitsinissamut suliniuteqarniarneq assersuutigalugu isumaqatigiissitsiniartartut 34-imi inissisimavoq, pinerluuteqarsimasunullu iperagaaqqammersunut tapersersorteqartitsinermik aaqqissuussineq kingullerpaalluni normu 63-imiippoq.

Nunatsinnut Eqqartuussiveqarnermut isumalioqatigiissitaq isumaliutissiissutinik arfineq-marlunnik takissuseqartumik saqqummersitsivoq. Taakkunannga innersuussuterpassuit maannamut piviusunngortinneqanngillat.

AAMMA ATUARUK Godt med kurser og værktøjer

AAMMA ATUARUK Inatsisinik atuutsitsinermut tunngasut nukittorsarnissaat itigartitsissutigineqartoq