Eqqartuussiveqarneq IA-p pitsanngorsaavigerusukkaa

Politiit, eqqartuussiveqarneq pinerluttunillu isumaginnittoqarfik sukumiisumik pitsanngorsaavigineqartariaqarput.

Folketingimut ilaasortaq Aaja Chemnitz Larsen taama isumaqarpoq. Taanna sapaatip akunnerani matumani inatsisinik atortitsinermut tunngasutigut politikkikkut siunnersuuteqarpoq.

- Isumaqarpunga inatsisinik atortitsineq eqaannerusoq,  inuiaallu inatsisitigut illersugaanerannik sulineq nutaaliaanerusoq Kalaallit Nunaanni pisariaqartikkipput. Isumaqarpunga avatangiisit pitsanngorsarlugillu annerusumik digitalinik atortoqarlernissaq sulissutigisariaqaripput. Minnerunngitsumillu inuit eqqartuussiveqarfimmiittut eqqarsaatigalugit.

Siunnersuutit katillugit 30-it Inuit Ataqatigiit folketingimi ilaasortaatitaata saqqummiuppai. Inatsiseqarnermut ministeri ataatsimeeqatigisarlugu ukiamullu aningaasanut inatsit isumaqatigiinniutigineqalerpat siunnersuutit iluatsinniarneqassapput.

Siunnersuutit inatsisinik atortitsinermut ministereqarfimmut ingerlatinneqarsimapput, tassani siunnersuutit piviusunngornissaannut aningaasartuutissanik naatsorsuisoqassaaq, kingornalu nalunaaruteqarluni.

Taamaattumik Aaja Chemnitz Larsen aalajangiiffigisassamik ukiamut siunnersuuteqarniarpoq, kalaallit eqqartuussiveqarnermi pissutsitigut pitsanngorsaavigineqarnissaannut naalakkersuisut pisussaaffilerneqarniassammata.

- Kalaallit Nunaanni eqqartuussiveqarnermik atuisunik oqaloqateqaraangama maannakkut suleriaatsit naammagittaalliutigineqartarput. Isumaqarpunga inuit sapinngisaminnik iluamik sulisut. Piumasarigutsigulu siunissami pissutsit allannguuivigineqarnissaat taakku maanna allannguiffigisariaqarpagut, Aaja Chemnitz Larsen oqarpoq.

Siunnersuummi kredsdommerit ilinniartitaanerunissaat, eqqartuussivinni suleriaatsit sukkanerusut, isumatigiissitsiniartartumik pilersitsineq parnaarussaasimasullu iperangaangaangata siunnersuisartussanik pilersitsinissat ilaapput.

Naalakkersuisuttaaq inatsisinik atortitsinermut tunngasunut suleriaasissanik suliaqarniartut isumaginninnermut, ilaqutariinnut, naligiisitaanermut inatsisinillu atortitsinermut naalakkersuisoq Sara Olsvig nalunaareerpoq.

Erna Lynge Helle Nørrelundip ilannguatassiaa aallaavigalugu paasissutissiisuuvoq.