MIO: Utaqqisarneq akuerineqarsinnaanngilaq

Nunatsinni meeqqanut kinguaassiutitigut kannguttaatsuliortoqarsimatillugu videokkut apersuilluni killisiuiniarneq amerlasuutigut unammillernartoqartoq, sapaatit akunneranni kingullermi tutsiuppoq. Politiit ingerlaannaq apersuisinnaanngikkaangata, kommuneqarfiit peqqinnissaqarfillu ikiuussinnaalluarput. Taamaalilluni meeqqat pisinnaatitaaffiisa unioqqutinnginnissaat qulakkeerneqarsinnaavoq. Meeqqat illersuisuat taama oqarpoq.
- Pisussaasut akisussaaffeqartut politiiuunnaanngillat tassa napparsimaveqarfiit kommunet allatigullu aamma uani suleqatigiinnikkut annertuumik suliassaqarput, meeqqat pisinnaatitaaffii malinniassagunikkit, meeqqat illersuisuat Aviaja Egede Lynge KNR-imut oqarpoq. Assi © : MIO
Allattoq Paninnguaq Steenholdt
oktobarip 30-at 2017 15:01

- Pisussaasut akisussaaffeqartut politiiuunnaanngillat tassa napparsimaveqarfiit kommunet allatigullu aamma uani suleqatigiinnikkut annertuumik suliassaqarput, meeqqat pisinnaatitaaffii malinniassagunikkit, meeqqat illersuisuat Aviaja Egede Lynge KNR-imut oqarpoq.

Meeraq kinguaassiutitigut kannguttaatsuliorfigineqarsimappat ullut arfineq marluk qaangiutsinnagit politiinit apersorneqartussaavoq. Apersuinerlu aatsaat pereerpat, meeqqap kannguttaatsuliorfigineqarsimanini allanut oqaluuserisinnaavaa. 

AAMMA ATUARUK Nunatta piffissarititaasut naammassiuminaatsikkai

Nunattalu kingusinnerpaaffiliussaasut naammassiuminaatsikkai, Kalalallit Nunaanni politiini unnerluussisussaatitaasut pisortaat Morten Nielsen sapaatit akunnerat kingulleq KNR-imut oqarpoq:

 - Illersuisunngortitaqarniarneq, atortunik pisariaqartinneqartunik pissarsiorneq, timmisartukkut billetsissarsinissaq silallu qanoq innera apeqqutaasarput. Suut tamaasa ataqatigiisinnissaat unammillernarsinnaasaqaaq.

Niviarsiaraq ullut 165-it utaqqisoq

Niviarsiaqqap politiinit apersorneqarnissani ullut 165-it utaqqisimagaa, danskit aviisiata  Politikenip oktoberip ulluisa 15-ianni allaaseraa. Morten Nielsenip oqaaseqaatai taassuminnga aallaaveqarput.

Meeqqat pisinnaatitaaffiisa malinneqannginnerannut Morten Nielsenip naassuiaatai meeqqat illersuisuata naammaginartinngilai.

AAMMA ATUARUK Niviarsiaraq killisiorneqarnissaminut ullut 165-it utaqqivoq

Apersuinissap pinissaata tungaanut meeqqap ilaqutaasullu illersorneqarnissaat angujumallugu, kommuneqarfiit peqqinnissaqarfillu piareersimasoqartitsisariaqartut, meeqqat illersuisuat isumaqarpoq:

 - Assersuutigalugu sumiiffinni assigiinngitsuni taamatut pisoqarsimasitullugu piareersimasussanik pikkorissaasoqarsinnaavoq akisussaasunillu inissiisoqarsinnaavoq.

Suliap ingerlanneqarnerani meeqqap utaqqerujussuartarnera meeqqat illersuisuata akuerisinnaanngilaa.

  - Taamatut utaqqisaanneq assersuutigalugu maannakkut politiiniippoq taava tassaneereerpat uunga pissaaq. Taamatut suleriaaseqarneq utaqqinermi innarligaanerpaasoq tassa meeraq. Inersimasut imminut utaqqisaanneranni meeqqap akilertarpaa taannalu akuerineqarsinnaanngilaq, Aviaja Egede Lynge KNR-imut oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk