Meeqqanik apersuisarneq: Nunatta piffissarititaasut naammassiuminaatsikkai

Meeqqanik kinguuaassiutitigut kannguttaatsuliorfigineqarsimasoqartillugu, videokkut apersuinissaq inatsit malillugu ullut arfineq marluk qaangiutinnagit ingerlanneqartussaasoq Danmarkimi politeeqarfiit naammassiuminaatsittaraat oqaluttuarineqareersorlu, Kalalallit Nunaanni politiit unnerluussisussaatitaasut pisortaat Morten Nielsen KNR-imut taama oqarpoq.

Ajornartorsiullu nunatsinni aamma atuuppoq:

- Kalaallit Nunaanni sumiiffiit ilaanni inatsit malissallugu piviusorsiunngilaq, Morten Nielsen oqarpoq.

Politiit sumi qaqugukkullu apersuinissaq naleqqunnersoq nalilertariaqartarpaat.
- Illersuisunngortitaqarniarneq, atortunik pisariaqartinneqartunik pissarsiorneq, timmisartukkut billetsissarsinissaq silallu qanoq innera apeqqutaasarput. Suut tamaasa ataqatigiisinnissaat unammillernarsinnaasaqaaq, Morten Nielsen taama oqarpoq.

Nunatsinni politiit 10-12 missaanniittut videokkut killisuisinnaanermut allagartaqarput.

Videokkut nunatsinni massakkumut 90-eriarluni apersuisoqareersimasoq, unnerluussisussaatitaasut pisortaata erseqqissarpaa. Danmarkimi apersuinerit taama ittut siorna 850-it missaanniipput. Tassalu inuttussuseq malillugu videokkut tusarniaasarnerit Danmarkimut naleqqiullugu nunatsinni 10-15-riaammik amerlanerupput.

- Politeeqarfiit susassaqarfiissa angissusaat eqqarsaatigalugu taama amerlatigisunik apersuiniartarneq unammillernartoqarpoq. Taava aamma soorunami videokkut apersuinissat amerliartortillugit kukkunissaq qaninneruleriartortarpoq.

AAMMA ATUARUK Niviarsiaraq killisiorneqarnissaminut ullut 165-it utaqqivoq

Meeqqat videokkut apersuinissamut agguaqtigiisillugit qanoq utaqqitigisarnersut Kalaallit Nunaanni politiit ilisimaqqissaanngilaat. Politiilli naalagaffik tamakkerlugu pisortaqarfiannit kaammattorneqareerlutik kisinnialerpaat. Paasissutissanik katersineq aasaq mana aallartittoq, Morten Nielsen oqaluttuarpoq:
 
- Pissutsit qanoq isikkoqavinnersut ukiup affaata missaa qaangiuppat takutinneqarsinnaalissasoraakka. Utaqqiisaa suliagut ingerlatissuagut.