Sapaatiummat ullaassakkut aportingajappit? Taamaappat politiit tusarfigerusuppaatsit
Kalaallit Nunaanni Politiit Nuummi sapaammi ullaassakkut biilinik malersuinermut suli ilisimannittussarsiorput. Sapaammi 04.45 aamma 05.00-ip akornanni sumiiffiit Qullilerfik, Pikkori Sportip eqqaani biilinut unittarfiup eqqaani imaluunniit Daddy’s-ip eqqaanniissimaguit politiit tusarfigerusuppaatsit.
Politiit innuttaasunik biilinik malersuinermik takunnissimasunik imaluunniit pisuinnarnik inuunerminnik navianartorsiortinneqarlutik aportingajassimasunik attaveqarfigineqarusupput, politiit taama kaammattuuteqarput.
Politiit pigaartuisa pisortaata, Karl Sværdip tamanna ullaap tungaani uppernarsarpaa.
- Arlallit aportingajapput, taakkulu inuttassarserusuppagut, taanna KNR-imut oqarpoq.
Biilinik illoqarfikkut malersuineq
Sapaammi ullaasakkut nalunaaqutaq 04.39 biili sangujoraartoq takuneqarneratigut tamanna aallartippoq. Biilimik ingerlatsisup pisuinnaat arlallit apungajappai, politiillu biili sumiissuserseriarlugu unitsinniarsaraat, biilimilli ingerlatsisoq sukkalisaarluni qimaaniarluni aalajangerpoq.
- Biilinik illoqarfikkut malersuisoqalerpoq, taamaanneranilu pisuinnaat arlallit apungajattarpai, pisuinnaammi aqqutaatigut aamma ingerlavoq, Kalaallit Nunaanni Politiit pigaartuisa pisortaat, Aputsiaq Hansen KNR-imut ippassaq oqarpoq.
Politiit biilip saavanut unillutik unitsitsiniarlutik aalajangerput. Biilit tamarmik taamaalillutik apornerminni ajoquserput, inunnilli ajoqusertoqanngilaq.
Biilinik ingerlatsisoq novembarip arfineq-aappaanut tigummigallagassanngortinneqartoq
Politiit inuit pingasut biiliniittut tigusaraat, biilinillu ingerlatsisoq 20-p naajartorneranni ukioqartoq, imigassartorsimatilluni biilinik ingerlatsisutut pasineqarpoq. Taanna tigummigallagassanngortinneqarpoq, aaversillunilu, biilimi ilaasut allat marluk iperagaaqqipput.
Biilimik ingerlatsisoq Eqqartuussisoqarfik Sermersuumi ippassaq sassartinneqarpoq, novembarillu arfineq-aappaanut tigummigallagassanngortinneqarluni.
Politiit tigusarinninniarnerminni isiginnittumit aamma saassunneqarput, taannalu atorfilimmut nakuusertutut aamma unnerluutigineqarluni.
Suliamut atatillugu paasissutissaateqaruit politiit oqarasuaammut 701448-mut imaluunniit GRL@politi.dk-mut attavigineqarsinnaapput.
