Nuummi qimaalluni biilertup pisuinnaat apungajalluinnarpai
Nalunaaqutaq 04.39 pinerluttaalisitisut nalunaarfigineqarput ingerlatiinnartumillu biiliminnik aallartitsipput. Nuup qeqqani pisuinnaafiit ikaartarfigisaata eqqaani biilit sangujoraarlutik ingerlaartut siumorpaat, pinerluttaalisitsisullu biilit takugamikkit unitsinniaraluarpaat, ingerlatsisulli sukkalisaaqaluni qimaassalluni toqqarpaa.
-Illoqarfikkut biilinik malersuisoqalerpoq, taamaanneranilu pisuinnaat arlallit apungajattarpai, pisuinnaammi aqqutaatigut aamma ingerlavoq, Aputsiaq Hansen Kalaallit Nunaanni Politiit pigaartuisa pisortaat ilisimatitsivoq.
Biili qimaasup saavanut unillutik qimaasoq unitsippaat. Biilit apornermi ajutoorput, inunnilli ajutoortoqanngilaq.
Ingerlatsisoq eqqartuussaassaaq
Imigassartorsimalluni biilinik ingerlatsisimasutut pasisaalluni ingerlatsisoq 18-leereersoq tigusaavoq, biilini inuit pingasut tigusaapput. Biilinik ingerlatsisoq tigummigallagaavoq aaversillunilu, ilaasut marluk iperagaareersut.
-Biilernera inunnik allanik ulorianartorsiortitsiviusoq pissutigalugu tigummigallagaassasoq aalajangerparput, taamaattumik ullup ilaa eqqartussivimmut sassartinneqassaaq Aputsiaq Hansen oqarpoq.
Tigusinerup nalaani pinerluttaalisitsisut isiginnaartumit saassunneqarput, saassussisorlu atorfilimmik suliaminik suliaqarnerani annersaaniartutut nalunaarutigineqarpoq. Biilimiittumi inunni attuumassuteqarnersoq ilisimaneqanngilaq.
Aportingajassimasut imaluunniit pisup eqqaaniissimasut pinerluttaalisitsisunut 70 14 48-mut nalunaaqqullugit Kalaallit Nunaata politiivisa kaammattorpaat.
