Nuummi toqutsineq pillugu suliami eqqartuussut: Erneeraq Lundblad paarineqartussanngortinneqartoq

Mianersoqqussut: Ilanngutassiami paasissutissat sakkortupput.

22-nik ukiulik, Erneeraq Lundblad Nuummi Blok O-mi arnamik 82-inik ukiulimmik toqutsisimasutut 2023-mi februaarip qulinganili tigummigallarneqalerlunilu pineqaatissinneqarsimasunut inissiisarfimmiilersoq paarineqartussanngortinneqarluni eqqartuunneqarpoq.

Nunatta Eqqartuussisuuneqarfiata tamanna aalajangeqqammerpaa, suliamillu suliarineqaqqitassanngortitsinermi ulloq kingulliusoq paasissutissiiffigalugu.

22-nik ukiulik Eqqartuussisoqarfik Sermersuumit oktobarip aallartinnerani paarineqartussanngortinneqarluni eqqartuunneqarpoq, angutilli suliaq Nunatta Eqqartuussisuuneqarfianut ingerlaannartumik suliarineqaqqitassanngortippaa.

- Naak inuusukkaluaqisutit eqqartuussiveqarfik isumaqatigaarput, eqqartuussisoq eqqartuussutip nalunaarutiginerani oqarpoq.

Angut 2023-mi januaarimi arnap Blok O-mi angerlarsimaffianut ullaassakkut isersimasutut 1.000 koruunimillu tillissimasutut maanna eqqartuunneqarpoq.

Angutilli inissiamiinnermini arnaq utoqqaq 21-nit ikinnerunngitsunit anaalersimavaa pinngitsaalillugulu kujassimallugu. Arnarlu toqoreermat qungasiatigut kinguaassiutaasigullu sipisimavaa.

Naggataatigullu inissiaq ikuallatseriarlugu qimassimavaa.

Eqqartuussut naammagisimaaraa

Erneeraq Lundbladip arnaq pinngitsaalillugu kujassimallugu Nunatta Eqqartuussisuuneqarfiani nassuerutigaa. Eqqartuussullu oqaatigineqarmat qisuariaateqanngilaq.

Angut paarineqartussanngornissami tungaanut maanna tigummigallarneqassaaq.

Erneeraq Lundbladip illersuisuata pinngitsuutinneqarnissaa imaluunniit sivisunerpaamik ukiuni arfineq-pingasuni pineqaatissinneqarsimasunut inissiisarfimmiittussanngortinneqarnissaa piumasarigaluarpaa.

Unnerluussisussaatitaasullu eqqartuussisoqarfimmit eqqartuussutip eqqortuutinneqarnissaa piumasaralugu, unnerluussisussaatitaasup eqqartuussut taamaammat naammagisimaarpaa.

- Suliaq peqqarniitsunik ilaqarpoq. Eqqartuussivimmi aamma Nunatta Eqqartuussisuuneqarfiani paasissutissarpassuit peqqarniilluinnartut toqutsinerit pillugit suliani allani asingusuni takunikuunngisagut saqqummerput. Taamaammat suliaq peqqarniilluinnarsimavoq, suliallu ullumikkut naammassineqarnera nuannaarutigaara, Nunatta Eqqartuussisuuneqarfiani suliami unnerluussisussaatitaasoq, Josefine Minor Christensen oqarpoq.