Sanaartugassanut Iluarsagassanullu Aningaasaateqarfik 846 mio. kr.-inik uninngasuuteqarpoq

Aningaasanut inatsisissap isumaqatiginninniutigineqarneranut atatillugu Sanaartugassanut Iluarsagassanullu Aningaasaateqarfik eqqaaneqallattaartupilussuusarpoq, pingaartumik aningaasarpassuit sanaartugassanut atugassat aningaasaateqarfimmittut pillugit. Anders Olsenip Naalakkersuisunut § 37 naapertorlugu apeqquteqaateqarneratigut aningaasaateqarfiup 846.892.097 kr.-inik uninngasuuteqarnera paasinarsivoq.
Allattoq Peter Troelsen, Simon Uldum
decembarip 03-at 2013 12:49

Anders Olsenip aamma apeqqiutigaa suliassat suut sumilu  pilersaautigineqarsimanersut aammalu aningaasat qanoq amerlatigisut immikkoortinneqarsimanersut, naalakkersuisulli Siverth K. Heilmann tamanna akissuteqarfiginngilaa. Sanaartugassanut Iluarsagassanullu Aningaasaateqarfiup siorna nassuiaataa innersuussutigiinnarpaa.

Naggasiutigalugulu Anders Olsenip apeqqutigaa suliassat suut ukiuni tullerni ingerlanneqartussatut aningaasaateqarfimmit pilersaautigineqarnersut, Heilmannillu politikererpalaavissorluni imaqanngivissortumik akissuteqarpoq.

-Sanaartugassanut Iluarsagassanullu Aningaasaateqarfimmi suliassat tamaasa assigalugit, suliassat sapinngisamik sukkanerpaamik naammassineqartarnissaat pilersaarutaavoq, tassani suliassami tunngavissat allanngornerisigut taamaatinneqavinnerisigulluunniit suliassat allanngortinnissaannut naalakkersuinikkut piginnaatitsisoqarsimanngippat, naalakkersuisoq Siverth K. Heilmann akissuteqarpoq.

Aamma atuaruk