Issittumi Siunnersuisoqatigiinni oqallisigisinnaasanik pingaarnerutitaqanngitsoq

Ruslandip avannaata kitaani ataatsimeereerluni sapaatip akunnerata siuliani taama oqarpoq.

Nunat Issittumiittut akornanni attaveqatigiinneq pitsaanerujartorpoq, aamma Issittumi siunnersuisoqatigiinni.

Nunanut allanut tunngasunut ministeri Anders Samuelsen ulluni marlunni issittoq pillugu Ruslandimi ataatsimeersuareerluni ministereqatinilu Lavrov ataatsimeeqatigereerlugu taama oqarpoq.

- Isumaqarpunga tamarmik soqutigigaat Issittumi siunnersuisoqatigiit maannamiit sukkanerusumik suleriaaseqalernissaa. Soorunami suleqatigiiffinni taama ittuni nikallortoqartarpoq malissiortoqartarlunilu. Nuannaarutigaara tamarmik isumaqatigiimmata siunissami aamma siunnersuisoqatigiiffiussasoq pingaarutilik.

Arkhangelskimili Islandip præsidentia, Anders Samuelsen, Ruslandip præsidentia Putin russillu nunanut allanut tunngasunut ministeriat Lavrov naapipput.

Pingaarnersiuisimanngitsoq

Issittumi siunnersuisoqatigiinni suut politikkikkut Anders Samuelsenip oqallisigitinniarnerai aperigatsinni akivoq:

- Pingaarnersiuinikuunngilanga. Issittumut tunngasut tamarmik oqallisissaqqipput, qujanarporlu tamarmik taamaaliorusummata nunanut allanut tunngasunut ministeri oqarpoq.

Kalaallit Nunaannimita Issittumi taama ingerlasoqalernera tigussaasumik qanoq malugineqarsinnaava, ministeri KNR-imit aperaarput.

- Isumaqarpunga Kunngeqarfittut Danmarkitut aamma Kalaallit Nunaannut tunngasunik oqalliffissaqarluta. Taamaaliorsinnaanerput pingaaruteqarpoq isummallu tamarmik tusarniarneqartarput. Issittumi Siunnersuisoqatigiit tamatumunga atussavarput, Anders Samuelsen oqarpoq.